Almatyda sýretshi Zulqaınar Qojamqulovtyń kórmesi ashyldy

Kórmege sýretshiniń qazaq halqynyń mádenıeti, turmysy men salty aıqyn, aıshyqty kórinis tabatyn 50-den asa sýretteri qoıylǵan.

"Kórmege 1993 jyldan beri salǵan sýretterimmen qatar, bıyl salǵan 15 týyndym qoıyldy. Bul meniń Almatydaǵy alǵashqy kórmem. Men tapsyryspen jumys istegennen góri, óz erkimmen jumys jasaǵandy jaqsy kóremin. Ol oıyńdaǵyńdy jetkizýge múmkindik beredi. Men boldym, toldym demeımin, áli de izdenis ústindemin", - dedi sýretshi Zulqaınar Qojamqulov.

QR Sýretshiler odaǵynyń tóraǵasy Baıtursyn Ómirbekovtyń aıtýynsha, "Zulqaınar - qazirgi ýaqyttaǵy qazaq sýret keńistigindegi qarymdy eńbek etetin sýretshilerdiń biri. Onyń basqa sýretshilerden ereksheligi - onyń túr-tústi kórsetýi men kompozıtsııalyq pishininiń daralyǵy", - dedi ol.

Sýretshiniń iri týyndylary qataryna 1995-1997 jyldary B.Túlkıevpen birlesip salǵan tarıhı "Uly kósh"sýreti jatady. Ol qazir Almaty qalasyndaǵy Elbasy Rezıdentsııasynda tur. Ekinshi iri týyndylarynyń biri - Túrkistan qalasyndaǵy monýmentaldy "Túrki halyqtarynyń tarıhy" atty panoramalyq jumysy bolyp tabylady. Onyń sonymen qatar, "Dybys úni", "Ystyq toqash", "Kezek", "Qazyǵurt kemesi", "Tóle bı", "Sahna", "Sáýkele kıgen qyz" jáne taǵy da basqa týyndylary kópshiliktiń yqylasyna bólengen. Qylqalam sheberi jurshylyqqa sýretshi retinde ǵana emes, maıly boıaý sheberi ári, músinshi retinde belgili.

Zulqaınar Qojamqulov halyqaralyq, búkilodaqtyq, respýblıkalyq jáne oblystyq kórmelerdiń qatysýshysy, QR Dızaınerler odaǵynyń múshesi, "Álem halyqtarynyń óneri" atty Halyqaralyq qaýymdastyqtyń múshesi, QR mádenıet qaıratkeri.

Kórme qazan aıynyń 14-ine deıin jalǵasady.