Almatyda «Suńqar» halyqaralyq shańǵy tramplıninde sport kesheni ashyldy
ALMATY. QazAqparat - Qala ákimi Baqytjan Saǵyntaev sport kesheninen, beıimdeý ortalyǵynan jáne jabyq júzý basseıninen turatyn ekinshi kezektegi «Suńqar» halyqaralyq shańǵy tramplınine bardy, dep habarlaıdy QazAqparat tilshisi.
Sport kesheni 6 myń sharshy metrden astam aýmaqta ornalasqan. Ol ártúrli sport baǵyty boıynsha aýqymdy sharalarǵa arnalǵan: erkin, grek-rım jáne áıelder kúresi, kazak kúresi, boks, dzıýdo, taekvondo, mını-fýtbol, voleıbol, basketbol, gandbol jáne taǵy basqalary.
Sport kesheni 1285 orynǵa eseptelgen (658 statsıonarlyq otyratyn oryn, jyljymaly minbelerde – 627 oryn). Sport alańynyń kólemi – 22h42 metr, tóbesiniń bıiktigi – 12 metr.
Keshen jattyǵý úshin sporttyq kerek-jaraqtarmen tolyq jabdyqtalǵan. Parket júıesine erekshe nazar aýdarylady, arnaıy jabyn sportshylardyń qaýipsizdigin qamtamasyz etedi.
7 jolǵa arnalǵan 25h16 metrlik jabyq júzý basseıni túrli sý sport túrleri boıynsha iri, sonyń ishinde halyqaralyq jarystardy ótkize alady.
Sondaı-aq ortalyqta saýyqtyrý jáne demalý úshin úı-jaılar, dýsh, massaj kabıneti, kıim sheshetin bólmeler, medıtsınalyq kabınet, saýna jáne jattyqtyrýshy bólmeleri qarastyrylǵan. BAQ úshin kommentatorlar bólmesi jáne parkıng bar.
Beıimdeý-jattyǵý ortalyǵynda is-sharalardy ótkizý úshin tolyq jabdyqtalǵan 108 bólme, úsh zamanaýı konferents-zal bar. 500 orynǵa arnalǵan kafe, basseıni bar ashyq jazǵy alań qarastyrylǵan.
Jobaǵa 7,7 mlrd teńge ınvestıtsııa tartyldy. Almaty Business 2025 kásipkerlikti damytý óńirlik baǵdarlamasy aıasynda sporttyq qural-jabdyqtar satyp alýǵa 84 aıǵa jyldyq 6%-ben 500 mln teńge somasynda jeńildikti nesıe berildi.
Osy jobany qarjylandyrý aıasynda aýtızmi bar balalardy basseınde nusqaýshymen tegin jattyqtyrý múmkindigi qamtamasyz etildi.
