Almatyda sýıtsıdke sebepker bolǵan polıtseı 5 jylǵa sottaldy
ALMATY. QazAqparat - Almatyda Bostandyq aýdany ІІB kómekshisine sýıtsıdke qatysy bar degen aıyp taǵyldy, dep habarlaıdy QazAqparat tilshisi.
№2 Bostandyq aýdandyq sotynyń habarlaýynsha, oqıǵa 2016 jyldyń 11 jeltoqsanynda bolǵan. Sol kúni tańǵy saǵat 04-56-da aýdandyq ІІB kezekshi bólimine «Start» bılıard klýbynda jappaı tóbeles bolǵany týraly aqparat túsken. Tańǵy 05:03-te «Boran-136/137» 7 adamdy bólimshege alyp kelip, kezekishiniń kómekshisi Danabek Daıyrovqa tabystaǵan. Daıyrov ustalǵandardyń biri - Nurjan Baımanasovty jeke ýaqytsha ustaý bólmesine basshylyqtyń kelisiminsiz, eshqandaı qujat toltyrmastan qamaǵan. Ony jalǵyz qamap, qalǵandarynyń aty-jónin anyqtaý maqsatynda bólmeden shyǵyp ketken. Tańǵy 05:48-05:50 aralyǵynda Nurjan Baımanasov beldigine asylyp ólgen. Múrdeni tańǵy 06-18-de anyqtaǵan. Sot-medıtsınalyq saraptama qortyndysy Baımanasovtyń qylǵynyp ólgenin rastady.
Sotta Danabek Daıyrov kinásin moıyndaǵan joq. Alaıda, sot jınaqtalǵan materıaldar negizinde 27 maýsym kúni onyń kináliligin dáleldep, ony 5 jylǵa bas bostandyǵynan aıyrýǵa úkim shyǵarǵan.
Daıyrov qazirgi ýaqytta qylmystyq túzeý mekemesinde jazasyn ótep júr. Sondaı-aq, ol qaza tapqannyń otbasyna 200 myń teńge kóleminde moraldyq shyǵyn óteıdi.
Sottalýshy appelıatsııalyq satyǵa shaǵymdanǵanymen, sot bastapqy úkimdi ózgerissiz qaldyrdy.
