Almatyda sý tasqyny ahýaly turaqty jaǵdaıda - B.Ysqaqov

Bul jaıynda qalalyq Jedel daıyndyq pen tótenshe jaǵdaılar jónindegi departament dırektory Baýyrjan Ysqaqov QazAqparat tilshisimen tildesý kezinde aıtty.

B.Ysqaqov búgin Almaty qalasy ákiminiń qatysýymen jınalys ótip, onda sý tasqyn máselesi qaralǵandyǵyn jetkizdi. "Alataý aýdanynyń "Áıgerim" yqshamaýdanynda azdaǵan qıyndyqtar bar, qazir onyń aldyn alýǵa qarjy bólinip, tehnıkalar jumys isteýde, asa qaýipti eshteńe joq. Qala boıynsha sý aǵatyn aryq jelileriniń qoqysqa tolyp qalýy másele týdyryp otyr. Almaty ákimi osy keleńsizdikterge baılanysty búgin naýryzdyń aıaǵyna deıin barlyq aryq jelilerin qoqys keptelisterinen tazartýdy buıyrdy", -deıdi ol.

Onyń paıymdaýynsha, tazalyq adamdardyń ózderine baılanysty. "Bul jaǵdaı jyl saıyn qaıtalanýda, turǵyndar qoqysty aryqqa, ózenge tastaıdy. Bul bizdiń áli de tazalyqta ómir súrýge beıimdelmegendigimizdi kórsetedi. Barlyǵyna taǵy da qoqysty ár jerge laqtyrmaı, arnaıy jáshikterge aparyńdar dep aıtqym keledi", -dep B.Ysqaqov halyqtyń keıbir áreketterine kóńili tolmaıtyndyǵyn jetkizdi.