Almatyda sý qoımasyna qum tókken aýmaq ıesine aıyppul salyndy
ALMATY. QazAqparat - Jumysshylar Almaty qalasynyń «Zelenstroı» aýmaǵyndaǵy sý qoımasynyń bógetine qum tókken. Mundaı zańsyz áreketke barǵan jer ýchaskesi ıesine aıyppul salyndy, dep habarlaıdy QazAqparat tilshisi.
Jetisý aýdany ákimdiginiń habarlaýynsha, qazir qum tógý jumys tolyǵymen toqtatyldy.
«Jetisý aýdanynyń ákimdigi ekologııalyq zańnamanyń buzylýyna baılanysty arnaıy komıssııalyq tekseris júrgizdi. Tekserý barysynda jasandy rezervýar bógetine qum tógilgendigi anyqtaldy. Eshkimmen kelispeı jáne eskertpeı osyndaı is áreketke barǵany úshin P. esimdi azamatqa 20 AEK (shamamen 50 myń teńge) ákimshilik aıyppul salyndy.
Jetisý aýdanynyń ákimi Maqsat Qıqymov bul sý kól emes, aǵyndy jáne jer asty sýlaryn aǵyzatyn júıe ekenin aıtty.
«Bul 60 gektarǵa jýyq bos jatqan jer. Munda ınvestıtsııa tartýǵa bolady. Alaıda, jer jekemenshik ıeligine ótken», - dedi ákim.
Atalǵan ýchaskedegi jumystar sý resýrstaryn paıdalanýdy retteý jáne qorǵaý jónindegi Balqash-Alakól basseındik ınspektsııasy maquldaǵanǵa deıin toqtatyldy. Sońǵy sheshimdi tabıǵatty qorǵaý uıymdary shyǵarady.
