Almatyda sý dobynan respýblıkalyq birinshilik ótýde
ALMATY. Qazannyń 25-i. QazAqparat /Erbol Turymbetov/ - Almatydaǵy Ortalyq júzý basseıninde sý dobynan 1995 jyly týǵan qyzdar men jasóspirimder arasynda Qazaqstan Respýblıkasynyń birinshiligi ótýde.
Birinshilikti Qazaqstannyń sý sporty túrleri qaýymdastyǵy uıymdastyryp otyr. Oǵan Almaty, Taraz, Qaraǵandy, Astana jáne Oral qalalarynyń komandalary qatysyp jatyr. Qazannyń 23-i kúni bastalǵan birinshiliktiń sońǵy aqtyq oıyndary osy aıdyń 27-si kúni ótedi.
Jarystyń maqsaty kópshilikke sý doby sportyn úgittep-taratý, jas urpaqty esirtkisiz salaýatty ómir saltyna baýlýǵa baǵyttalǵan. Uıymdastyrýshylar saıys qorytyndysy boıynsha, jeńimpaz sportshylardyń Respýblıkalyq komanda quramyna alynatyndyǵyn málim etti. Sonyń negizinde, qurama Reseıdiń Chelıabi qalasynda ótetin ashyq chempıonatyna qatysatyn bolady.
