Almatyda sý dobynan Álem Kýbogy ótkiziledi
ALMATY. QazAqparat- Almatyda ortalyq júzý basseıninde aldaǵy 19-24 tamyz aralyǵynda sý dobynan Álem Kýbogy ótkiziledi. Bul týraly Qazaqstannyń sý sporty túrleri federatsııasynyń baspasóz qyzmetinen habarlady.
Álem Kýbogyn sý dobynan Qazaqstan qurama komandasynan basqa, Ońtústik Afrıka Respýblıkasy, AQSh, Avstralııa, Serbııa, Chernogorııa, Horvatııa jáne Vengrııa qurama komandalary sarapqa salady.
Aıta ketelik, vaterpoldan Álem Kýbogy Halyqaralyq júzý federatsııasynyń qamqorlyǵymen 1979 jyldan beri júrgizilip keledi. Jarys 1999 jylǵa deıin eki jylda bir ret ótkizilip keldi. Al 2002 jyldan bastap, tórt jylda bir ret ótkiziletin boldy.
Rýmynııanyń Oradıa qalasynda ótken sońǵy Álem Kýbogynda Serbııa qurama komandasy birinshi oryndy jeńip alǵan bolatyn. Ekinshi orynǵa Horvatııa komandasy kóterilse, ıspandyqtar úshinshi oryndy mise tutty.
Al Almatyda Álem Kýbogy 19 tamyz kúni Astana ýaqyty boıynsha kúndizgi saǵat 13:00- de bastalady. Munda Chernogorııa men Serbııa qurama komandalary kezdesedi. Al saǵat 17:00-de Álem Kýbogynyń ashylý saltanaty bolady. Osydan keıin, Sergeı Drozdov bastaǵan qazaqstandyq vaterpolshylar avstralııalyqtarmen kezdesedi.
