Almatyda sý basý qaýpi joǵary 56 aımaq anyqtaldy
ALMATY. QazAqparat – Almatyda sý basýǵa barynsha beıim 56 aýmaqta apattyq-qalpyna keltirý jumystaryn shuǵyl júrgizý talap etiledi. Qala ákimi Erbolat Dosaevtyń qatysýymen ótken keńeste kóktemgi sý tasqynyna daıyndyq máseleleri talqylandy, dep habarlaıdy QazAqparat tilshisi.
Tótenshe jaǵdaılar departamenti men «Qazseldenqorǵaý» qyzmetkerleri kún saıyn qalanyń barlyq aýdanyndaǵy sý aıdynyna, ózen arnasyna monıtorıng júrgizedi. Departament málimetinshe, Úlken Almaty, Kishi Almaty, Esentaı, Qarǵaly, Aqsaı, Jarbulaq, Tiksaı ózenindegi jaǵdaı turaqty. Sýdyń irkilýi men muzdar joq, sý kedergisiz aǵyp jatyr, seń júrmeıdi dep boljanyp otyr.
Qala halqynyń qaýipsizdigin qamtamasyz etý maqsatynda 2023 jylǵy sý tasqyny kezeńine TJM aýmaqtyq bólimsheleriniń, qalanyń azamattyq qorǵaý qyzmetteriniń jáne ákimdiktiń merdigerlik uıymdarynyń kúshteri men quraldarynyń jalpy sany 2 581 adam jáne ártúrli maqsattaǵy 1 078 birlik ártúrli tehnıka jasaqtaldy. Sý tasqynyna qarsy jumystarǵa 23 500 qap jáne 17 843 tonna ınertti materıal daıyndaldy.
13 aqpandaǵy jaǵdaı boıynsha 765 km aryq jelisi qardan, muzdan jáne qoqystan tazartyldy, bul – jospardyń 57,5%-y. Bul jumysqa kún saıyn 79 tehnıka men 283 adam jumyldyryldy. Aryq jelisin tazartýdy aqpan aıynyń sońyna deıin aıaqtaý josparlanǵan.
Ekologııa jáne qorshaǵan orta basqarmasynyń aqparaty boıynsha kóktem kezindegi sý tasqynynyń aldyn alý úshin qalada 6 ózenniń (Tiksaı, Jarbulaq, Esentaı, Oıjaılaý, Boraldaı, Qarasý) aýmaǵynda 206 km jaǵalaý nyǵaıtyldy. Endi taǵy 127,7 km ózen arnasynda jaǵalaýdy nyǵaıtý jumystaryn júrgizý qajet, olarda qatty jaýyn-shashyn kezinde sý tasqyny paıda bolady. Qazirgi kezde uzyndyǵy 37,7 km tórt ózenniń (Úlken Almaty, Kishi Almaty, Bókenbaı jáne ÚAK) jaǵalaýyn nyǵaıtý jáne abattandyrý boıynsha jobalyq-smetalyq qujattama ázirlenip jatyr. Qalǵan 90 shaqyrymdy Almaty qalasyn damytý baǵdarlamasy aıasynda 2030 jylǵa deıin abattandyrý josparǵa engen.
Saıran sý qoımasynda mehanıkalyq tazartý jumystary júrip jatyr. Naýryz aıynda Áýejaı kóli men Qarasý shaǵyn aýdanyndaǵy toǵandy tazalaý bastalady.
Ekologııa jáne qorshaǵan orta basqarmasy sý basýǵa beıim ýchaskeler boıynsha monıtorıng júrgizip, 102 ýchaskeni anyqtady. Onyń ishinde apattyq-qalpyna keltirý jumystaryn shuǵyl júrgizýdi talap etetin, sý basýǵa barynsha beıim 56 aýmaq anyqtaldy. Qazir bul jumys 92%-ǵa oryndaldy, olar 31 naýryzǵa deıin aıaqtalady dep josparlanǵan.
2023-2024 jyldary 376 km aryq jelisin salý jáne jańǵyrtý jónindegi jobany iske asyrý aıasynda qalǵan 46 aýmaqty sý basý máselesi sheshimin tabady.
Foto: Almaty oblysy ákimdiginiń baspasóz qyzmeti
