Almatyda sý basqan tustarda kommýnaldyq qyzmet jumys istep jatyr
ALMATY. QazAqparat – Almatyda tolassyz jaýǵan jaýynnan kóshelerdi sý basty, dep habarlaıdy QazAqparat tilshisi.
Sý astynda qalǵan kóshelerdegi kórinisti turǵyndar sýretke, vıdeoǵa túsirip, áleýmettik jelige jarııalap jatyr.
Aǵyn sý aryqtan asyp trotýarlarǵa jaıylyp ketken. Ásirese kópirlerdiń asty men saılarda sý tizege jetip qalady.
Almaty qalasynyń azamattyq qorǵaý qyzmetiniń málimetinshe, sý basyp qalýy múmkin ýchaskelerge ınertti materıaldar men arnaıy tehnıka jiberildi.
Tańǵy saǵat 10:00-degi aqparat boıynsha myna mekenjaılardy sý basty:
Medeý aýdany - Elektr qýatynyń bolmaýyna baılanysty ál-Farabı men Nazarbaev dańǵyldarynyń qıylysyndaǵy kópir astynda sorǵy sónip, sý jınaldy. Qazirgi ýaqytta aýdandyq kommýnaldyq qyzmetter sol jerde jumys istep jatyr («Almaty tazalyq», Almaty sý, Qutqarý qyzmeti 109,) 2 arnaıy tehnıka men 6 motosorǵy iske qosyldy. Sorǵy stantsııasy da qosylǵan.
Almaly aýdany – Sý basqan S.Muqanov kóshesinde «Almaty tazalyq» kompanııasynyń qyzmetkerleri jumys istep, jumysty aıaqtady. 30 qap ınertti materıal paıdalanyldy.
Bostandyq aýdany - Esenalıev kóshesi 33-úıdiń jertólesine sý jınaldy, sý aryq júıesine buryldy, 40 qap qoldanyldy.
M.Áýezov aýdany - 9-yqshamaýdandaǵy 51-úıdiń jertólesin sý basty. «Almaty tazalyq» qyzmetkerleri jumys júrgizdi.
Túrksib aýdanynda - «Qaırat 93» yqshamaýdany boıynsha JTÚ aýlasyn sý basty, «Almaty tazalyq» qyzmetkerleri jumys júrgizip, aıaqtady.
Almatyda keshe túnde bastalǵan jańbyr áli de tolassyz jaýyp tur.
