Almatyda stýdenttiń ólimine baılanysty komıssııa quryldy
ALMATY. QazAqparat- Búgin Almatyda Qanysh Sátbaev atyndaǵy Qazaq ulttyq tehnıkalyq zertteý ýnıversıtetinde 4-shi kýrs stýdentiniń ólimine baılanysty arnaıy komıssııa quryldy. Bul týraly atalmysh joǵary oqý ornynyń baspasóz qyzmetinen habarlady.
Komıssııa qaıǵyly oqıǵanyń sebepterin, mán-jaıyn anyqtaıtyn bolady. Onyń quramyna ýnıversıtet rektory, oqytýshylary jáne zańgerleri endi. Aıta ketelik, bul oqıǵa 30 qarasha kúni Q.Sátbaev atyndaǵy Qazaq ulttyq tehnıkalyq zertteý ýnıversıtetiniń bas korpýsynda bolǵan. Ázirge málim bolǵandaı, 4 kýrstyń eki stýdenti arasynda janjal oryn alady. Urys-keris barysynda bir stýdent ekinshi stýdentke pyshaq suǵyp alady. Sonyń saldarynan jábirlenýshi oqıǵa ornynda jantásilim etken. Qazir tergeý amaldary júrgizilip jatyr.
