Almatyda stýdenttik jataqhanalar qurylysynyń jobalyq ofısi ashyldy
Sharaǵa QR Ǵylym jáne joǵary bilim mınıstri Saıasat Nurbek, Almaty qalasy ákiminiń orynbasary Arman Qyryqbaev, joǵary oqý oryndarynyń rektorlary qatysty.
QR Ǵylym jáne joǵary bilim mınıstri Saıasat Nurbektiń aıtýynsha, búgingi kúni jataqhanalardaǵy oryn tapshylyǵy máselesin sheshý úshin elimizde júıeli jumystar júrgizilip keledi.
«Jataqhanadaǵy oryn tapshylyǵy máselesin sheshý úshin elimizde búgingi kúni júıeli sharalar qabyldanyp jatyr. Sonyń biri - Almaty, Astana, Aqtóbe, Shymkent, Túrkistan sekildi úlken qalalarda stýdenttik jataqhanalar qurylysynyń jobalyq ofısteri ashylyp jatyr. Bul jobalyq ofıster táýlik boıy jumys isteıdi. Onda merdiger kompanııalar, joǵary oqý oryndary jataqhana salýdaǵy máselerdi sheshetin bolady. Búgingi jıynda Sátpaev atyndaǵy Qazaq ulttyq tehnıkalyq zertteý ýnıversıteti eki úlken jataqhana salý boıynsha ınvestorlarmen kelisimshart jasasty. Bul Sátpaev ýnıversıtetiniń jataqhanadaǵy oryn tapshylyǵy máselesin 50-60% jabýǵa kómektesedi»,- dedi Nurbek Saıasat.
Onyń aıtýynsha kelesi jyly Qonaev qalasynda arnaıy akademııalyq qalashyq ashylady.
«Prezıdent tapsyrmasymen kelesi jyly Qonaev qalasynda arnaıy akademııalyq qalashyq ashylady. Ol úshin arnaıy 100 ga jer bólindi. Bul másele boıynsha qazir Almaty oblysy ákimdigimen birlese jumystar júrgizip jatyrmyz. Ol akademııalyq qalashyqqa elimizdiń JOO-lary zerthanalaryn, fakýltetterin kóshire alady. Akademııalyq qalashyq 2024 jyly ashylady»,- dedi Ǵylym jáne joǵary bilim mınıstri Saıasat Nurbek.
Shara barysynda stýdentterdi jataqhanalardaǵy oryndarmen qamtamasyz etý boıynsha birlesken jumysty odan ári jaqsartý boıynsha Ǵylym jáne joǵary bilim mınıstrligi men Almaty qalasynyń ákimdigi arasynda yntymaqtastyq týraly memorandýmǵa qol qoıyldy.
Aıta keteıik, Almatyda ashylǵan stýdenttik jataqhanalar qurylysynyń jobalyq ofısi jergilikti atqarýshy organdarǵa, joǵary oqý oryndary men ınvestorlarǵa stýdentterdi jataqhanamen qamtamasyz etý jónindegi máselelerdi jedel jáne júıeli sheshý úshin alań usynady.
Almaty qalasy ákimdiginiń baspasóz qyzmetiniń málimetinshe, jobalyq ofıstiń negizgi fýnktsııalary:
- jataqhanalardaǵy stýdenttik oryndardyń tapshylyǵyn sheshý boıynsha joǵary oqý oryndarymen jáne ınvestorlarmen ózara árekettesý;
- qurylysqa járdem kórsetý máseleleri boıynsha Almaty qalasynyń jer qatynastary, qalalyq josparlaý jáne ýrbanıstıka, qala qurylysyn baqylaý basqarmalarymen ózara árekettesý;
- joǵary oqý oryndary men áleýetti ınvestorlar úshin zańgerlik, konsýltatsııalyq, saraptamalyq jáne basqa da qyzmetter kórsetý.
«Búgingi tańda Almaty qalasyndaǵy stýdenttik jataqhanalardaǵy jalpy tósek-oryn tapshylyǵy – 32 myńdy quraıdy. Almaty qalasyn damytýdyń 2025 jylǵa deıingi baǵdarlamasy sheńberinde 12 myń tósek-orynǵa, al 2030 jylǵa deıin taǵy 20 myń orynǵa jataqhana salý josparlanýda»,- delinedi ákimdik habarlamasynda.
Jobalyq ofıs Almaty qalasy, Baıtursynov kóshesi, 22 mekenjaıynda ornalasqan.
