Almatyda stýdenttik ózin-ózi basqarý tájirıbesine arnalǵan halyqaralyq forým ótti
ALMATY. 22 sáýir. QazAqparat /Ádilet Musahaev/ - Búgin ál-Farabı atyndaǵy Qazaq ulttyq ýnıversıtetiniń Ó.A.Joldasbekov atyndaǵy Stýdentter saraıynda «Qazirgi zamanǵy ýnıversıtettegi stýdenttik ózin-ózi basqarý: tájirıbesi, ınnovatsııa jáne bolashaǵy» atty halyqaralyq stýdenttik forým ótti.
Forýmnyń plenarlyq májilisinde Eýropa, TMD jáne otandyq JOO stýdenttik uıymdarynyń kóshbasshylary men halyqaralyq uıymdardyń ókilderi qatysyp, oqý oryndaryndaǵy búgingi kúngi Stýdenttik ózin-ózi basqarý uıymdarynyń tájirıbesimen bólisti.
«Ózin-ózi basqarý - úlken jaýapkershilik. Stýdentter ózin-ózi basqara otyryp, ózderine úlken mindet alady. Jáne sol mindetterdi mundaı uıymdar arqyly ózderi sheshedi. Ár eldegi jastar ózin-ózi basqarýdy júıeli atqarsa qoǵamda sheshimin tappaǵan máseleler de bolmaıdy», - dep atap óz sózinde QazUÝ rektory Ǵalymqaıyr Mutanov.
Stýdenttik uıymdar men jastardyń halyqaralyq dostastyǵynyń teń tóraǵasy, M.V.Lomonosov atyndaǵy Máskeý memlekettik ýnıversıteti Stýdenttik odaǵynyń tóraǵasy Andreı Andrıanov Reseıdegi stýdenttik ózin-ózi basqarý damýynyń negizgi baǵyttarymen bólisip, búgingi forým qazaqstandyq oqý ordalarmen tájirıbe almasýda úlken úles qosady degen oıyn bildirdi. Sondaı-aq Japonııadaǵy Vaseda ýnıversıteti stýdentter kásipodaǵynyń tóraǵasy Atsýshı Saıto, F.M.Dostoevskıı atyndaǵy OmMÝ stýdentter keńesiniń tóraıymy Alena Chýdına, Qyrǵyz Respýblıkasy Prezıdenti janyndaǵy basqarý akademııasynyń Jastar isi komıtetiniń tóraǵasy Jalyn Jenalıev, Qazaqstan stýdentteri Alıansynyń respýblıkalyq uıymynyń kóshbasshysy Shyńǵys Beskempirov jáne taǵy basqa qatysýshylar stýdenttik ózin-ózi basqarýdy damytýdyń máseleleri men keleshegi týraly pikir almasty.
«Tuńǵysh ret álem elderi jastarynyń basyn qosyp ózekti máselege arnalyp otyrǵan forým alda bul salalar boıynsha bıik jetistikter men jańa bastamalar jasaýǵa túrtki bolmaq», -deıdi ıAgellon ýnıversıteti «Bratniak» stýdentter men aspıranttar Qorynyń Prezıdenti Gjegoj Mýranskıı.
Budan keıin forým sektsııalar men dóńgelek ústel jumystarymen jalǵaspaq. Erteń forýmnyń korytyndy plenarlyq májilisi ótip, jastar taqyryp boıynsha qarar qabyldaıdy.
