Almatyda stýdentti óltirdi degen kúdikpen jasóspirim ustaldy
ALMATY. QazAqparat - Almatyda 16 jastaǵy jasóspirim 18 jastaǵy stýdentti óltirdi degen kúdikpen ustaldy, dep habarlaıdy QazAqparat tilshisi.
Qalalyq ІІD baspasóz qyzmetiniń habarlaýynsha, atalǵan derek boıynsha QR QK 99-babynyń 1-bóligi boıynsha M.Áýezov aýdandyq ІІB-de sotqa deıingi tergeý amaldary júrip jatyr.
«Atalǵan qylmysty jasady degen kúdikpen 16 jastaǵy jasóspirim qalalyq ІІD ýaqytsha oqshaýlaý ornyna qamaldy. Ol qylmys jasaǵanyn moıyndady», - dedi qalalyq ІІD baspasóz qyzmetiniń jetekshisi Saltanat Ázirbek.
Sonymen qatar, polıtsııa qylmysqa qatysy bolýy múmkin degen adamdardy anyqtaý úshin tergeý júrgizýde.
Búgin «Aqsaı» ýnıversıtetindegi emhana bas dárigeriniń orynbasary Shaherızada Ahashevanyń 18 jastaǵy uly kisi qolynan mert bolǵany belgili boldy.
Balanyń ólimi jaıly S.Asfendıarov atyndaǵy Qazaq Ulttyq medıtsınalyq ýnıversıtetiniń saıtynda jazyldy. Dárigerdiń áriptesteri onyń qaıǵysyna ortaqtasyp, kóńil aıtqan.
«S.Asfendıarov atyndaǵy Qazaq Ulttyq medıtsınalyq ýnıversıtetiniń ujymy «Aqsaı» ýnıversıtettik emhanasynyń bas dárigeriniń orynbasary Shaherızada Ahashevanyń 18 jastaǵy balasy Janurdyń qaza bolýyna baılanysty qaıǵyryp kóńil aıtamyz. Jannur bıyl mektep bitirip, joǵarǵy oqý ornyna túsken bolatyn», - delingen jazbada.
