Almatyda stýdentterge arnalǵan eń úlken jataqhana paıdalanýǵa berildi

ALMATY. QazAqparat - QR Densaýlyq saqtaý mınıstri Eljan Birtanov Almaty qalasynda Asfendııarov atyndaǵy Qazaq Ulttyq medıtsına ýnıversıtetiniń jańa jataqhanasynyń ashylý saltanatyna qatysty, dep habarlaıdy QazAqparat tilshisi.

Búgin elimizdegi eń iri jáne jaıly jataqhanalarynyń biri ashyldy. Bul QazUMÝ-diń 8-shi jataqhanasy jáne Qazaqstannyń eń kóne joǵary oqý ornynyń Táýelsiz jyldarynda salynǵan alǵashqy jataqhana.

Ashylý saltanatyna QR Densaýlyq saqtaý mınıstri Eljan Birtanov, JOO-nyń basshylyǵy men stýdentter qatysty. QazUMÝ kóp jyldan beri jańa jataqhanaǵa muqtaj bolǵan ýnıversıtet.

Bul Prezıdenttiń Bes áleýmettik bastamasynyń aıasynda qysqa merzim ishinde salynǵan iri jataqhana. Elimizdiń jetekshi medıtsınalyq ýnıversıteti úshin stýdentter úıiniń paıdalanýǵa berilýi - kópten kútken oqıǵa.

Búginde Asfendııarov atyndaǵy QazUMÝ-da basqa qalalardan kelgen 6 myńǵa jýyq bozbala men boıjetken bilim alyp júr. Olardyń jartysyna jataqhanadan oryn tabylǵan joq. Jańa jataqhana bul problemany sheshe alady. 

Oǵan qosa, mundaǵy jaǵdaı úıdegideı jaıly. Toǵyz qabatty eki ǵımarattan turatyn jataqhanada 75 orynǵa arnalǵan ashana, kir jýatyn bólme, 30 adamǵa arnalǵan oqý zaly, kitap qoımasy, ınternet synyptar, demalý bólmeleri, medıtsınalyq pýnkt jáne ákimshilik bólmeler bar.



Stýdentterdiń jaılylyǵy úshin as daıyndaıtyn jáne jýynatyn bólmeleri bar eki jáne úsh oryndyq bólmeler usynylǵan. Bólmelerde kereýet, jazý ústeli, kıimge arnalǵan shkaf jáne taǵy basqa qajetti jıhaz bar.