Almatyda stýdentter jataqhanasyna degen qajettilik 33 myń orynnan asady

ALMATY. QazAqparat – Almatyda stýdentter jataqhanasyna degen qajettilik 33 myń orynnan asady. Bul týraly búgin Ǵylym jáne joǵary bilim mınıstri Saıasat Nurbektiń rektorlarmen jáne ınvestorlarmen kezdesýinde aıtyldy, dep habarlaıdy QazAqparat vedomstvonyń áleýmettik jelidegi paraqshasyna silteme jasap.

Kezdesýde joǵary oqý oryndarynyń jańa oqý jylyna daıyndyǵy jáne stýdentterdi baspanamen qamtamasyz etýge baılanysty máseleleri talqylandy. Stýdenttik jataqhanalarda oryn tapshylyǵy máselesin sheshýge, qoldanystaǵy jataqhanalardy jańǵyrtýǵa jáne stýdentterdiń jaılylyǵyn arttyrý úshin jańa tehnologııalardy engizýge erekshe nazar aýdaryldy. Sondaı-aq, jańa stýdenttik jataqhanalardyń qurylysyndaǵy ilgerileýshilik qarastyrylyp, Almatyda stýdenttik jataqhanalardyń qurylysy boıynsha jobalardy iske asyrýmen aınalysatyn jobalyq keńseniń jumysy týraly aqparat usynyldy.

Kórip otyrǵanymyzdaı, búgingi tańda Almaty joǵary oqý oryndarynda oqýǵa nıet bildirýshiler kóbeıip keledi. Almaty qalasyndaǵy joǵary oqý oryndarynyń derekteri boıynsha qajettilikke boljam jasaldy: 32 718 tósek-oryn. Bul – jańa qabyldaýdy esepke almaǵandaǵy boljam. Osyǵan baılanysty ótken jylǵy tájirıbeni jáne osy másele boıynsha táýekelderdi eskere otyryp, jan-jaqty sharalar qabyldaý qajet. Joǵary oqý oryndarynyń basshylaryna 15 tamyzǵa deıin barlyq josparlanǵan jóndeý jumystaryn aıaqtaýdy, sondaı-aq korpýstarda, jataqhanalarda, ashanalarda jáne sanıtarııalyq toraptarda tolyq dezınfektsııalaý jumystaryn júrgizýdi tapsyramyn

, - dedi mınıstr.