Almatyda stýdentter teatry kezekti qoıylymyn usyndy
ALMATY. 19 qarasha. QazAqparat /Erbol Turymbetov/ - Almatydaǵy Ó. Joldasbekov atyndaǵy stýdentter saraıynda «Biz» stýdentter teatrynyń kezekti «Ol kóktem oralmaıdy» atty qoıylymy boldy. Qoıylym rejısseri - Ǵalymjan Saılaýbekov, stsenarıı avtory - «Biz» stýdentter teatry ujymy.
Ál-Farabı atyndaǵy Qazaq ulttyq ýnıversıtetiniń tálimgerlerinen quralǵan «Biz» stýdentter teatry óz jumysyn 2006 jyly bastaǵan bolatyn. 2006 jyldyń sáýir aıynda kórermenderin «Adaspańdar» atty tyrnaqaldy týyndysymen qýantqan óner ujymy ár jylda túrli taqyryptaǵy qoıylymdaryn usynýmen keledi. Aıta keterlik bir jáıt, teatr repertýaryndaǵy «Adaspańdar», «Toı», «Baǵdarsham» jáne basqa da stsenarıılerdiń barlyǵy stýdentterdiń óz shyǵarmashylyǵy bolyp tabylady.
«Bizdiń barlyq qoıylymdarymyzdyń máni jastardy ımandylyqqa, adaldyqqa, tazalyqqa tárbıeleýge baǵyttalǵan. Biz óz týyndylarymyzdy sahnalaý arqyly qatarlas stýdent jastarymyzdy osyndaı ıgi qasıetterge baýlyǵymyz keledi. Quramy jyl saıyn jańaryp, jańa stýdenttermen tolyǵyp otyratyn «Biz» teatrynyń ǵumyry da uzaq bolaryna senemin», - deıdi teatr múshesi, fılologııa fakýltetiniń 4 kýrs stýdenti Ardaq Qultaev.
Stýdentter teatrynyń barlyq týyndylary ómir shyndyǵyna saı qurylǵan. Adam taǵdyrynda kezdesetin san qıly ómir joly, túrli qıynshylyqtar men jastyq jalyn, mahabbat jáne basqa da taqyryptardyń barlyǵy teatr sahnasynyń negizgi aıshyqtary. Teatr, sonymen birge, nashaqorlyq, maskúnemdik, alaıaqtyq sııaqty qoǵamnyń ózekti máselelerin de qozǵaı otyryp, jastardy odan qashyq bolýǵa shaqyrady.
«Jalpy, teatrdyń «Biz» dep atalýynyń ózi biz - jastar, aramyzdaǵy aıyqpas keselderden ózimiz aýlaq bolýǵa tyrysamyz, onymen birge kúresemiz degen ıdeıadan týǵan. Sondyqtan, stýdentter barlyq stsenarıılerin ózderi jazyp, ózderi sahnalaıdy. Qazirgi tańda teatr ujymy ýnıversıtet qabyrǵasynda úlken bedelge ıe. Aldaǵy ýaqyttarda da osyndaı qoıylymdarymyzben kórermenderimizdi qýanta bermekpiz», dedi teatr rejıseri Ǵ. Saılaýbekov.
Ctýdenttik óner ujymy endi jeltoqsan aıynda «Fetýs» («Shaqyrylmaǵan qonaq») atty qoıylymyn sahnalaǵaly otyr.
