Almatyda stýdentter men ata-analar jataqhanadan oryn talap etti, JOO ne deıdi

ALMATY. QazAqparat – Abaı atyndaǵy Qazaq ulttyq ýnıversıtetiniń stýdentteri men olardyń ata-analary jataqhanadan oryn talap etip otyr. Bul týraly vıdeo áleýmettik jelide tarady, dep habarlaıdy QazAqparat tilshisi.

Atalǵan joǵary oqý ornynan oqıǵanyń 28 tamyzda ahýaldyq ortalyqta bolǵany málim etildi.

«Ýnıversıtettiń 5 jataqhanasyndaǵy tósek-oryndar birinshi kýrstan bastap halyqtyń áleýmettik osal toptarynan shyqqan stýdentterge úlestirildi. Jataqhanadan oryn almaǵan 150-ge jýyq stýdent pen ata-ana ortalyqqa kelip, oryn berýdi talap etti. Ýnıversıtet basshylyǵy jataqhanadan oryn ala almaǵan stýdentter men olardyń ata-analaryna jalǵa alynǵan birneshe hostel men jataqhanalardan oryn usynyp, túsindirme jumystaryn júrgizdi. Alaıda, kóptegen ata-ana oryndardyń jetispeýshiligine qaramastan, balalaryn ýnıversıtettiń jataqhanalaryna ornalastyrýdy talap etti», - dep habarlady oqý ornynyń baspasóz qyzmeti.

Búgingi tańda jaǵdaı turaqtaldy. Stýdentterdiń basym bóligi hostelderge qonystandy. Degenmen, hostelderdegi usynylǵan oryndardan bas tartyp jatqan ata-analar men stýdentter bar.

«4 qyrkúıekte birinshi kýrs stýdentterine jataqhanaǵa joldama berý jumysy aıaqtalady, odan keıin taldaý jasalyp, onyń negizinde oqý ornynyń jataqhanasyna ornalasýdan bas tartqan stýdentterdiń tizimi jasalady. Rezervtegi stýdentter bosaǵan oryndarǵa ornalastyrylady. Jataqhanalarda oryndardy bólý kezinde birinshi kezekte kópbalaly otbasylardan shyqqan stýdentterge, jetimderge, múmkindigi shekteýli tulǵalarǵa jáne basqa da jeńildikter berilgen birinshi kýrs stýdentterine basymdyq beriledi», - dep atap ótti ýnıversıtet ókilderi.