Almatyda stýdentter arasynda TJ-ǵa arnalǵan oqý-jattyǵý jıyny ótti
ALMATY. Qyrkúıektiń 10-y. QazAqparat /Erbol Turymbetov/ - Keshe Almatydaǵy Qazaq bas sáýlet-qurylys akademııasynda «Jer silkinisi, onyń paıda bola bastaýy, zilzaladan keıingi jáne órt jaǵdaılary men evakýatsııalaýdaǵy turǵyndardyń qorǵanýy» taqyrybynda tótenshe jaǵdaılar men órt qaýipsizdigine arnalǵan oqý dabyly bolyp ótti, dep habarlaıdy QazAqparat.
Azamattyq qorǵanys pen tótenshe jaǵdaılar baǵytynda ótken bul oqý-jattyǵý jıynyn atalmysh oqý orny Bostandyq aýdandyq TJ aýdandyq bólimshesimen birlese uıymdastyrdy. Oǵan Akademııanyń oqytýshylary men stýdentterinen quralǵan 3800 adam jáne Bostandyq aýdandyq TJAB-niń qyzmetkerleri qatysty. Oqý-jattyǵýdyń jıynynyń maqsaty turǵyndardyń TJ kezindegi shara qoldaný jaǵdaılarynan teorııalyq bilimderin arttyrýǵa baǵyttalǵan.
«Búgingi ótkizilip otyrǵan shara akademııamyzdyń stýdentteri men muǵalimderiniń Azamattyq qorǵanys salasyndaǵy bilimderin arttyryp qana qoımaı, TJ kezindegi azamattyq qorǵanys shtabtary mańyzynyń artýyna da úles qosady. Sonymen birge, azamattyq qorǵanystyń ár ýaqyttaǵy daıyndyǵyn qamtamasyz etedi», deıdi QazBSQA-nyń qurylys tehnologııasy, ınfrastrýktýra jáne menedjmend fakýltetiniń AQ jáne TJ jónindegi assotsıatsııalyq professory Bıbinur Tájiǵulova.
Oqý-jattyǵý barysynda qatysýshylar ár túrli deńgeıdegi tótenshe jaǵdaılarǵa qarsy qorǵanys sharalaryn kórsetti. Uıymdastyrýshylardyń aıtýynsha, bundaı shara bolashaqta da jalǵasatyn bolady.
