Almatyda stýdentter arasynda Shámshi ánderinen baıqaý ótkizildi (FOTO)
ALMATY. QazAqparat - Qazaq memlekettik qyzdar pedagogıkalyq ýnıversıtetinde belgili sazger, qazaq valsiniń koroli Shámshi Qaldaıaqovqa arnalǵan «Ánim sen ediń» atty án baıqaýy ótti.
Baıqaýdy Óner jáne mádenıet fakýlteti uıymdastyryp, 8 ónerpaz baq synasty.
«Bul ıgi sharany uıymdastyrýymyzdyń sebebi, bolashaq shyǵarmashylyq, óner adamdary bolǵan soń, stýdent-jastardy sol salanyń maıtalmany bolýǵa yntalandyrý. Onyń ústine Shámshi ánderi dese, óre túregelmeıtin qazaq joq. Baıqaýdyń maqsaty - bilim alýshylardyń patrıottyq sezimin oıatyp, Shámshi ánderin óskeleń urpaqqa jetkize otyryp, erekshe talanttardy tabý bolatyn», - dedi Mádenı-buqaralyq jumystardyń teorııasy men ádistemesi kafedrasynyń professory A.Kópbaev.
Sondaı-aq, keshke ádilqazylar alqasy retinde QR Eńbek sińirgen tanymal ánshileri Gúlnár Sıqymbaeva, Gúlmıra Aqúrpekova jáne QR Mádenıet qaıratkeri Gúlnur Ómirbaeva arnaıy kelip qatysyp, óz baǵalaryn berip, syn-pikirlerin aıtty.
Saıystyń sharty boıynsha úmitkerler eki týyndy oryndaý qajet boldy: biri Shámshi áni bolsa, ekinshisi erkin taqyrypta óner kórsetý. Oǵan qosa, baıqaýǵa qatysýshylar baıan, fortepıano, dombyra aspaptarynyń súıemeldeýimen ándi jandy daýyspen oryndap shyqty.
«Mádenı-buqaralyq jumystardyń teorııasy men ádistemesi» kafedrasynyń 4 kýrs stýdenti Aıdana Qýanysh bas júldeni aldy, 1-oryndy «Mýzykalyq bilim berýdiń teorııasy men ádistemesi» kafedrasynyń 4 kýrs stýdenti Kúnimqyz Sheralıeva ıelendi. Ekinshi oryndy 2 kýrs stýdenti Dana Tájihanova alsa, úshinshi orynǵa 1 kýrs stýdenti Qarlyǵash Násirova laıyq dep tabyldy. Al, qalǵandary yntalandyrý syılyqtarymen marapattaldy.
