Almatyda stýdentter arasynda konkı tebý sporty boıynsha II Álem chempıonaty bastaldy (FOTO)
ALMATY. QazAqparat - Búgin Almatyda «Medeý» sport kesheninde stýdentter arasynda konkı tebýden II Álem chempıonaty bastaldy.
Birinshilikke 12 elden, olardyń ishinde Norvegııa, Italııa, Polsha, Fınlıandııa, Nıderlandy jáne basqa da memleketterden barlyǵy 77 sportshy (40 jigit, 37 qyz) qatysýda.
«Medeý» sport kesheninde konkı tebýden sońǵy ret iri halyqaralyq týrnır sonaý 1988 jyly ótken bolatyn. Sondyqtan, biz sııaqty, osy bir sport túriniń ókilderi úshin atalmysh chempıonat - naǵyz mereke ispettes. Ulttyq qurama komanda qazir Álem chempıonaty aldynda óziniń oqý-jattyǵý jıynyn ótkizip jatyr. Stýdenttik Álem birinshiligine qatysatyn jas sportshylarymyz da bıik tuǵyrdan kórinedi degen úmittemin», - dedi arnaıy baspasóz máslıhaty barysynda QR konkı tebý sporty boıynsha ulttyq federatsııasynyń atqarýshy dırektory Radık Bıkchentaev.
FISU (Halyqaralyq ýnıversıtettik sport federatsııasy) atqarýshy komıtetiniń múshesi Kaırıs Ýlptiń aıtýynsha, mundaı jarystar FISU jáne ISU (Halyqaralyq konkı tebýshiler odaǵy) erejeleri men tehnıkalyq tártibine sáıkes ótkiziledi jáne 2017 jyly Almatyda XXVIII Búkilálemdik qysqy Ýnıversıada oıyndary aldyndaǵy testilik halyqaralyq jarys bolyp tabylady.
«Bul sporttyq shara Elbasynyń buqaralyq sport pen joǵary jetistikter sportyn damytýǵa baǵyttalǵan saıasaty aıasynda ótkizilip jatyr. Al bul jerde stýdenttik sporttyń alatyn orny erekshe. Óıtkeni, úlken sport qashanda jastardan bastalady», - dedi Almaty q. halyqaralyq sporttyq jobalary dırektsııasynyń dırektory Ilıa Orazaqov.
Tórt kúnge sozylatyn týrnır barysynda 500, 1000, 1500, 3000, 5000, 10000 metrlik qashyqtyqtarda saıystar ótedi. Sonymen qatar, komandalyq óksheleı qýalaý men mass-start jarysy da bolady.
