Almatyda stýdentter arasynda fýtzaldan álem chempıonaty ótedi
ALMATY.QazAqparat - Almatyda stýdentter arasynda fýtzaldan álem chempıonatyna sońǵy daıyndyq jumystary ótýde. Bul týraly Ulttyq stýdenttik lıganyń basshysy, Halyqaralyq aqparattyq tehnologııalar ýnıversıtetiniń rektory Damır Shynybekov aıtyp berdi, dep habarlaıdy QazAqparat qala ákimdigi baspasóz qyzmetine silteme jasap.
«Bizdiń elimiz iri sporttyq is-sharalardy ótkizýde zor tájirıbege ıe. Tek sońǵy jyldardyń ózinde Qazaqstanda, atap aıtqanda, Almatyda álemdik deńgeıdegi kóptegen sport jarystary ótkizildi. Fýtzal sııaqty dınamıkalyq jáne áserli sport túrinen álem chempıonaty ótýi - bizdiń qalamyzdyń turǵyndary men qonaqtary úshin úlken mereke bolmaq. Osy múmkindikti paıdalana otyryp, men barlyq sport súıer qaýymdy álemdi moıyndatqan sport sheberleriniń jarysyn tamashalap, jankúıer bolýǵa shaqyramyn. Almatylyq «Qaırat» fýtzal klýbynyń álemdik arenadaǵy jetistikteriniń arqasynda Qazaqstan osy sport túrin damytyp jatqan elderdiń biri. Almatyda ótetin stýdentter arasyndaǵy álem chempıonaty osyǵan dálel», - dedi Damır Shynybekov.
Sondaı-aq, Ulttyq stýdenttik lıganyń prezıdenti Qazaqstan álem chempıonatyn ótkizý quqyǵyn qalaı ıelengenin aıtty.
«Bul 2015 jyldyń qazan aıynda bolǵan. Álemniń birneshe iri qalalary osyndaı aýqymdy týrnırdi ótkizý quqyǵyna talasty, nátıjesinde FISU sheshimimen tańdaý Almatyǵa tústi. Bul aýqymdy oqıǵa TMD aýmaǵynda alǵash ret ótkiziletinin atap ótý kerek», - dedi Damır Ábdýhalıuly.
Tamyzdyń 19-y men 26-y aralyǵynda ótetin stýdentter arasyndaǵy fýtzaldan álem chempıonatyna bir aıdaı ýaqyt qaldy. Teńbil dop dodasyna álemniń ár tarapynan jınalǵan 16 er jáne 9 áıelder quramasy túsedi.
Jarystar barlyq zamanaýı talaptarǵa jaýap beretin eki iri sport kesheninde - Almaty Arena jáne Halyk Arena ótedi.
