Almatyda stýdent bıikten qulap ketkeli turǵan eki jasar balany aman alyp qaldy
ALMATY. QazAqparat- Pedagogıkalyq ýnıversıtettiń 19 jastaǵy stýdenti kópqabatty turǵyn úı kesheniniń jetinshi qabatynan qulap kete jazdaǵan eki jasar balany aman alyp qaldy, dep habarlaıdy QazAqparat tilshisi.
Almaty qalalyq Tótenshe jaǵdaılar departamentiniń málimetinshe, oqıǵa 21 shilde kúni 18 qabatty «Altynbulaq» turǵyn úı kesheninde bolǵan.
Qutqarýshylarǵa oqıǵa kýágeri Nur-Sultan qalasynyń turǵyny Ermekbaı Tamabaev habarlasqan.
Onyń aıtýynsha, kishkentaı bala jetinshi qabattaǵy órt baspaldaǵynyń qorshaýyna qysylyp qalǵan.
«Balanyń basy temir torǵa qysylyp qalǵan. Denesi men qoly syrtta, salbyrap turdy. Qulap ketýi múmkin edi», - deıdi kýáger Ermekbaı Tamabaev.
Qolyndaǵy bir jasar balany tastap kete almaǵan 67 jastaǵy qarııa kómekke úıdiń kireberisinde turǵan jastardy shaqyrǵan.
«Kómekke bir jas jigit júgirip keldi. Abyroı bolǵanda, kishkentaı balany aman alyp qaldy», - deıdi ol.
Ermekbaı Tamabaev qaısar stýdentke alǵysyn bildirdi.
19 jastaǵy jas qaharman Mahmýd Erasyl Arhatuly - Abaı atyndaǵy pedagogıkalyq ýnıversıtettiń dene shynyqtyrý fakýltetiniń stýdenti eken.
Vıdeodan alynǵan kadr
