Almatyda «Stroı Sıtı» saýda ortalyǵy tolyq iske qosylysymen Rysqulov dańǵyly boıyndaǵy eski pavılondar tolyq joıylady
ALMATY. 10 shilde. QazAqparat - Almatyda bazarlardy retke keltirý jumysy jol kólik qozǵalysyn jaqsartýǵa óz yqpalyn tıgizedi.
Bul jaıly qalalyq sáýlet jáne qala qurylysy basqarmasy bastyǵynyń 1-orynbasary Janat Aıtileý búgin buqaralyq aqparat quraldary ókilderin «Stroı Sıtı» bazary aýmaǵyndaǵy saýda ortalyǵynyń 2-kezeńi qurylysynyń barysymen tanystyrǵan kezde aıtty.
«Stroı Sıtı» seriktesigine qarasty bul bazardyń aýmaǵy 2,8 gektar jerdi alyp jatyr. Qurylys jumystary tolyq bitken kezde munda 13 myń sharshy metrge jýyq saýda alańdary bolady. 2009 jyly birinshi kezeńde ortalyqtyń 3,5 myń sharshy metri paıdalanýǵa berilgen bolatyn. Ekinshi kezeńiniń qurylysy 2010 jyly bastaldy, qazir árlendirý jumystary júrgizilýde. Aldaǵy 2 aıdyń ishinde saýda ortalyǵynyń aýmaǵy 5,5 myń metrge ulǵaıady. 4 myń sharshy metrlik qalǵan 3 keshen aldaǵy jyldary salynbaq», - deıdi J.Aıtileý.
Janat Ábdiqalyqulynyń aıtýynsha, ár keshen iske qosylǵan saıyn Rysqulov dańǵyly boıyndaǵy eski pavılondar alynyp, onda saýda jasap otyrǵan jeke kásipkerler saýda ortalyǵyna kóshiriledi. Máselen ortalyqtyń jańadan paıdalanýǵa berilgeli otyrǵan 3-shi kesheninde birinshi qabatta 130 saýda orny ornalassa, ekinshi qabatta 50-ge jýyq iri óndirýshilerdiń saýda alańdary ornalaspaq.
