Almatyda stıhııaly qoqys úıindilerin spýtnıktiń kómegimen taýyp jatyr

ALMATY. QazAqparat - Qazaqstanda 2018 jyldan bastap 39 eldi mekenge, onyń ishinde Almaty qalasyna ǵarysh monıtorıngi júrgiziledi. Ǵaryshtyq monıtorıng nátıjesi geoservıs arqyly qoqys qaldyqtary jınalatyn oryndardy kórsetedi ári olardy tıisti qyzmetter baqylaıdy, dep habarlaıdy QazAqparat.

Servıs qoqystyń ornyn, túrin, ýaqytyn anyqtap, mamandar túsinikteme engize alady.

Geoportaldyń kómegimen 2021 jyly 17 qoqys úıindisi tirkelgen, al osy jyldyń basynan beri Túrksib jáne Medeý aýdandarynda 10 stıhııaly qoqys orny anyqtalǵan.

Jergilikti ákimdikter anyqtalǵan aýmaqtarda tazalaý jumystaryn júrgizip jatyr.

Stıhııaly qoqys oryndaryn anyqtaý úshin qala ákimdigi ekologııa departamenti, mamandandyrylǵan tabıǵatty qorǵaý prokýratýrasy, aýdan ákimdikteri men «Medeý» memleketttik óńirlik tabıǵı saıabaǵy mamandarynan turatyn arnaıy jumys tobyn qurdy.

Jyl basynan beri jumys toby 37 stıhııaly qoqys ornyn anyqtap, onyń 32 joıyldy, qalǵan 5 tazalaý jumystary júrgizilip jatyr.

2021 jyly jalpy quny 109 mln bolatyn 2,5-ǵa jýyq ákimshilik hattama toltyryldy (QR «Ákimshilik quqyq buzý týraly kodeksiniń 505-baby boıynsha).

Osy jyldyń basynan beri quny 43,2 mln teńge bolatyn 1255 hattama toltyryldy.

Alynǵan málimetter stıhııaly qoqystardyń ashyq alańdarda, jyra-saılarda, qorshalmaǵan jeke qurylys aýmaqtarynda, Almaty oblysymen shekaralas qala aýmaǵyna qosylǵan aýyldarda jınaqtalyp qalatynyn kórsetti.

Almaty qalasynyń aýmaǵynda turmystyq qatqyl qoqystardy tastaýǵa arnalǵan 8000 konteıner, 1500 konteıner alańdary bar.

Qoqystar Naýryzbaı aýdany men Almaty oblysy Qarasaı aýdanynyń shekarasynda ornalasqan Aqsaı karerine jetkiziledi. Bıoydyraıtyn jáne iri suryptalmaıtyn qoqystar Almaty oblysyndaǵy polıgonǵa jetkiziledi.

Qaıtalama shıkizatty bólip jınaý maqsatynda konteıner alańdarynda tordan jasalǵan 1000 asa konteıner men 300-ge jýyq nan qaldyqtary salynatyn konteıner ornatylǵan.

Olardy shaǵyn jáne orta bıznes qaıta óńdeıdi. Sonymen qatar qala aýmaǵynda 37 qaıtalama shıkizat qabyldaý ortalyqtary jumys jasaıdy, al uıymdarda qaǵaz, plastık jáne áınek qoqystardy bólip salýǵa arnalǵan myńnan asa ekoboks qoıylǵan.

Stıhııaly qoqys úıindileriniń jańadan paıda bolýynyń aldyn alý úshin qala turǵyndary men qonaqtaryn qalany abattandyrý erejelerin saqtaýlary, qoqys tastaýǵa arnalǵan arnaıy konteınerlerdi paıdalanýǵa jáne arnaıy qoqys polıgonyna jetkizýge kelisimsharty bar uıymdarmen jumys jasaýǵa tıis.

Sondaı-aq baqylaý jáne shuǵyl shara qoldaný maqsatynda WhatsApp mesendjerinde tabıǵatty qorǵaý prokýratýrasy, ekologııa departament men aýdan ákimderiniń orynbasarlarynyń qatysýymen arnaıy chat quryldy.

Tazalyqty saqtaý, jınalǵan qoqystardy der kezinde tasymaldaý, stıhııaly qoqys oryndarynyń paıda bolýynyń aldyn alý úshin qala turǵyndary men qonaqtaryn Almaty qalasynyń ekologııa jáne qorshaǵan orta basqarmasyna habarlasýlaryn suraımyz (Whatsapp [phone]).