Almatyda «Star of Asia» kórermenderin arnaıy avtobýs tasymaldaıdy
ALMATY. QazAqparat -Almatyda álemniń eń tanymal ánshileriniń basyn qosatyn «Star of Asia» festıvaline daıyndyq qyzý júrýde, dep habarlaıdy QazAqparat tilshisi qalalyq ákimdiktiń baspasóz qyzmetine silteme jasaı otyryp.
Qalalyq ákimdiktiń habarlaýynsha, mádenı shara «Rýhanı jańǵyrý» baǵdarlamasy aıasynda uıymdastyrylmaq.
Aýqymdy mýzykalyq sharaǵa kelýshilerdi tasymaldaý úshin qalalyq ákimdik arnaıy avtobýs bólmek.
Kórermender Abaı dańǵylyndaǵy ortalyq stadıonda, Dostyq pen Qurmanǵazy kósheleriniń qıylysynda jınalady.
Jolaýshylar kóligi festıval ótetin jerge saǵat 16:00-den 18:30-ǵa deıin qatynaıdy. «Medeýden» keri qaıtatyn reıster 22:00-den 23:30-ǵa deıin júredi. Jolaqysy- 150 teńge.
Festıval ótetin kúnderi jeke kólikter úshin turaqtar sany artady.
Bıik taý shatqalyndaǵy aýa raıy qaladaǵydan edáýir salqyn, sondyqtan uıymdastyrýshylar festıval kúnderi jaýyn jaýyp, jel turýy múmkin ekenin eskertedi ári mádenı shara qonaqtaryna arnap jaýynǵa kıetin plaş ázirlep qoıdy.
Esterińizge salsaq, mádenı shara 19-20 tamyz kúnderi Almatyda ótedi.
Uıymdastyrýshylardyń aıtýynsha, festıval QR Prezıdenti Nursultan Nazarbaevtyń «Rýhanı jańǵyrý» maqalasy aıasynda jáne Almatynyń Qala kúni qarsańynda megapolıste oqıǵaly týrızmdi damytý maqsatynda ótkeli otyr.
Halyqaralyq sarapshylardyń baǵalaýy boıynsha, sońǵy on jyl ishinde oqıǵaly týrızm jedel damyp keledi. «Star of Asia» sharasy týrıster legin arttyrýǵa yqpal etedi. Qala basshylyǵy «Star of Asia» Almatydaǵy týrıstik salany óristetýdiń negizgi elementteriniń biri dep esepteıdi. Formaty jaǵynan múldem ózgeshe «Star of Asia» kontınentaldi festıvali «Azııa daýsynyń» jalǵasy ispetti. Ákimdik festıvaldi Amatyǵa keletin juldyzdar sany jáne sapasyna qaraı «San Remo»,«Slavıanskıı bazar», «Novaıa volna» sııaqty qurlyqtyq baıqaýǵa aınalýy múmkin ekenin aıttady.
«Festıvalǵa hıp-hoptan RnB-ge deıin, sondaı-aq, ındı-pop, elektr jáne rok, ıaǵnı túrli baǵyttaǵy ánderdiń zamanaýı úzdik oryndaýshylary keledi. Álemge tanymal sheteldik dıdjeıler hedlaınerlerge aınalady. Kontsertten ózge festıval barysynda fleshmobtar men túrli stıldegi bı battldary da kórsetiledi», - deıdi festıvaldi uıymdastyrýshylar.
Aıta keteıik, buǵan deıin habarlanǵandaı festıvalǵa Ońtústik Koreıanyń «U-Kiss» toby jáne «Asia Song Festival», «Chineese TOP Awards», «Best Male Music Video», «Korean Culture Entertainment Awards», «Korean Video», «Daejun Awards» mýzykalyq syılyqtarynyń laýreaty keledi.
Festıval bıletteri Kassir.kz, Chocolife.me, Ticketon.kz saıttary men Respýblıka saraıynyń, Mega Ortalyqtyń jáne «Meloman» jelisiniń kassalarynda satylady.
