Almatyda «Star of Asia» festıvali ótedi
ALMATY. QazAqparat -Almatyda álemniń eń tanymal ánishleriniń basyn qosatyn «Star of Asia» festıvali úshin Medeýde alǵash ret radıaldy formadaǵy sahna jasalady, dep habarlaıdy QazAqparat tilshisi qalalyq ákimdiktiń baspasóz qyzmetine silteme jasaı otyryp.
Qalalyq ákimdiktiń habarlaýynsha, sahnanyń tehnıkalyq ereksheligi retinde onyń kúrdeliligin aıtsa bolady. Sol úshin sahna qurýǵa Germanııa, Reseı jáne Ýkraınadan mamandar kelmek. Sonymen qatar, «Star of Asia» festıvalinde jaryq shuǵylalary men tamasha «fare» shoý usynylady.
Aıta keteıik, Almatyda 19 - 20 tamyz aralyǵynda erekshe formattaǵy «Star of Asia» halyqaralyq mýzyka festıvali ótedi. Uıymdastyrýshylardyń aıtýynsha, festıval QR Prezıdenti Nursultan Nazarbaevtyń «Rýhanı jańǵyrý» maqalasy aıasynda jáne Almatynyń Qala kúni qarsańynda megapolıste oqıǵaly týrızmdi damytý maqsatynda ótkeli otyr.
Halyqaralyq sarapshylardyń baǵalaýy boıynsha sońǵy on jyl ishinde oqıǵaly týrızm jedel damyp keledi. «Star of Asia» sharasy týrıster legin arttyrýǵa yqpal etedi.
Qala basshylyǵy «Star of Asia» Almatydaǵy týrıstik salany óristetýdiń negizgi elementteriniń biri dep esepteıdi. Formaty jaǵynan múldem ózgeshe «Star of Asia» kontınentaldi festıvali «Azııa daýsynyń» jalǵasy ispetti. Ákimdik festıvaldi Amatyǵa keletin juldyzdar sany jáne sapasyna qaraı «San Remo»,«Slavıanskıı bazar», «Novaıa volna» sııaqty qurlyqtyq baıqaýǵa aınalýy múmkin ekenin aıttady.
«Festıvalǵa hıp-hoptan RnB-ǵa deıin, sondaı-aq, ındı-pop, elektr jáne rok, ıaǵnı túrli baǵyttaǵy ánderdiń zamanaýı úzdik oryndaýshylar keledi. Álemge tanymal sheteldik dıdjeıler hedlaınerlerge aınalady. Kontsertten ózge festıval barysynda fleshmobtar men túrli stıldegi bı battldary da kórsetiledi», - deıdi festıvaldi uıymdastyrýshylar.
Aıta keteıik, buǵandeıin habarlanǵandaı festıvalǵa Ońtústik Koreıanyń «U-Kiss» toby jáne «Asia Song Festival», «Chineese TOP Awards», «Best Male Music Video», «Korean Culture Entertainment Awards», «Korean Video», «Daejun Awards» mýzykalyq syılyqtarynyń laýreaty keledi.
