Almatyda statsıonarlyq emes saýda nysandarynyń syrtyna qatysty jańa talaptar paıda boldy

ALMATY. QazAqparat - 2023 jyldyń 24 qańtarynan bastap, Almaty jáne qala mańyndaǵy aýmaqta statsıonarlyq emes saýda obektilerin ornatý qaǵıdalary kúshine endi. Bul týraly Óńirlik kommýnıkatsııalar qyzmetinde ótken baspasóz máslıhatynda qalalyq Kásipkerlik jáne ınvestıtsııalar basqarmasynyń basshysy Berik Soltanbaev málim etti, dep habarlaıdy QazAqparat tilshisi.

Aıtýynsha, jańa ereje statsıonarlyq emes bólshek saýda nysanynyń syrtqy túrine qoıylatyn talaptardy belgileıdi (SESN). Statsıonarlyq emes saýda nysanynyń eskızdik jobasy aýmaqtyń sáýlettik-kórkemdik kelbetin, estetıkalyq sıpattamalaryn saqtaı otyryp, qasbetterdiń syzbasy men nysannyń stıli, sondaı-aq aınaladaǵy ǵımarattardyń sáýlettik jáne qala qurylysy sheshimine sáıkes kelýi kerek.
«Kásipkerlik sýbektileri statsıonarlyq emes saýda obektilerin ornatý kezinde jaıaý júrginshilerdiń erkin júrip-turýyn (jaıaý júrginshiler trotýarynyń bóliginiń eni keminde 1,5 metrdi quraıdy), múgedekterge jáne basqa da az qozǵalatyn toptarǵa, halyqtyń, tótenshe jaǵdaılarda arnaıy kólikterdiń kedergisiz kirýine, órt sóndirý bólimshelerine, apattyq – qutqarý quraldarynyń qoldanystaǵy ǵımarattar men qurylystarǵa kirýine jaǵdaı jasaýdy qamtamasyz etýi kerek. Aıta ketý kerek, statsıonarlyq emes saýda nysandaryn ornatý men ornalastyrýdyń jańa erejeleri elimizde alǵash ret engizilip otyr. Jańashyldyq «Almaty qalasynyń erekshe mártebesi týraly» zańǵa sáıkes múmkin boldy», – deıdi Berik Soltanbaev.
Sonymen qatar ol jańa erejelerge sáıkes, taýarlardyń uqsas assortımentin satatyn uqsas statsıonarlyq bólshek saýda nysandarynyń bolmaýy ornalasý oryndaryn anyqtaýdyń mindetti sharty eken jetkizdi.
«Qoǵamdyq tamaqtandyrý obektileri sondaı-aq ornalasqan jerinen jıyrma metrden aspaıtyn qashyqtyqta ınjenerlik jelilerge (sý qubyry, káriz, elektr qýaty) qosylý núktelerin qajet etedi»,-dedi ol.