Almatyda sporttyq jartasqa órmeleýden QR chempıonaty ótýde
ALMATY. 7 sáýir. QazAqparat /Ádilet Musahaev/ - Almatyda sporttyq jartasqa órmeleýden QR chempıonaty ótip jatyr.
QR Týrızm jáne sport mınıstrligi bekitken sporttyq sharalardyń jobasy boıynsha 2011 jyly balalar arasynda jartasqa órmeleýden QR kýbogynyń 4 kezeńi jáne Qazaqstan chempıonaty, sonymen qatar eresek sportshylar arasynda QR chempıonaty ótkizilmek.
Saıysqa qatysýǵa tilek bildirgenderdiń quramynda jastar arasyndaǵy 2008-2010 jyldardaǵy Azııa chempıonatynyń jeńimpazdary bar eken.
"Bul jyly barlyq saıystar kúntizbelik jobaǵa kirgendigin jáne seriktesimiz "BTA saqtandyrý" kompanııasynyń qoldaýymen ótetindigin qýana aıta alamyz. Bizdiń seriktestigimiz Qazaqstannyń jartasqa órmeleý sporttyq túriniń damýyna jáne onyń keńinen tanylýyna óz septigin tıgizetindigine senimdimiz", - deıdi QR alpınızm jáne jartasqa órmeleý federatsııasynyń prezıdenti Qazbek Ýálıev.
Respýblıkalyq saıystardyń nátıjesinde jeńimpaz atanǵandar Mılanda (Italııa) jartasqa órmeleýden ótetin 2011 jyldyń Álem chempıonaty men Gonkongta bolatyn Azııa chempıonatyna qatysady.
