Almatyda sporttyq gımnastıkadan jazǵy spartakıada bastaldy
ALMATY. QazAqparat - Búgin Almaty qalasynda sporttyq gımnastıkadan Qazaqstannyń VI jazǵy spartakıadasy bastaldy, dep habarlaıdy QazAqparat.
Sportty damytý dırektsııasynyń málimetinshe, tórt jylda bir keletin bul jarysqa 7 óńirden 40-tan asa er, 8 óńirden 50-ge tarta tańdaýly áıel gımnast qatysady.
Erteń erler men áıelder irikteý kezeńinde baq synasa, 20-21 sáýirde jekeleı jáne kópsaıystan fınal ótedi. Bul spartakıadada elimizdiń jastar men eresekter quramasynyń sportshylary synǵa túsip, aldaǵy halyqaralyq jarystarǵa daıyndyǵyn pysyqtaıdy.
«El ishindegi olımpıadaǵa barlyq jastaǵy ulttyq qurama sportshysy jınaldy. Bári óz kombınatsııalaryna jańa elementter qosyp, jetildirip kóredi. Mysyly, shymkenttik Dıas Toıshybektiń qarqyny jaqsy. Ol munda eki baǵdarlamada kúrdeli elementer isteıdi. Dıas Spartakıadadan soń birden Álem Kýbogynda óner kórsetedi. Bári oıdaǵydaı ótse, Belgııadaǵy Álem chempıonatyna aparamyz», - dedi QR-nyń eńbek sińirgen jattyqtyrýshysy, Narıman Kýrbanovtyń jeke bapkeri Hýsanjan Kýrbanov.
Qazir negizgi ulttyq qurama jasaqtalǵan. Bapkerler spartakıadadan soń 2-qurama jasaqtaıdy. Olar Qytaıdaǵy Azııa oıyndarynda el namysyn qorǵasa, kóshbasshylar kúzde Belgııadaǵy álem chempıonatynda synǵa túsedi. Antverpende jeke baǵdarlamanyń ár jeńimpazy men úzdik nátıje kórsetken 12 qurama Parıj Olımpıadasyna tikeleı joldama alady.
Aıta keteıik, 4 jyl buryn Almatyda ótken sporttyq gımnastıkadan V spartakıadada áıelder arasynda jalpy esepte Almaty qalasy 1-oryn alsa, Qaraǵandy men Astana odan keıingi satyǵa jaıǵasqan. Erler arasynda da Almaty qalasy top jarsa, Shymkent qalasy ekinshi, Pavlodar oblysy úshinshi orynǵa ıe bolǵan.
Gımnastar básekesi qaladaǵy №9 olımpıada rezerviniń mamandandyrylǵan balalar-jasóspirimder mektebinde ótip jatyr.
