Almatyda sporttyq gımnastıkadan Qazaqstan chempıonaty bastaldy
ASTANA. QazAqparat - Almatyda sporttyq gımnastıkadan Qazaqstan chempıonaty men kýbogy jolyndaǵy jarys bastaldy, dep habarlaıdy QazAqparat tilshisi.
QR Ulttyq Olımpıada komıtetiniń taratqan málimetterine súıensek, týrnırge elimizdiń ár oblysynan tańdaýly sportshylar qatysyp jatyr.
24 maýsymǵa deıin sozylatyn dodada top jarǵandar tamyz aıynda Indonezııada ótetin Jazǵy Azııa oıyndaryna qatysady.
Sporttyq gımnastıkadan Qazaqstan ulttyq quramasynyń bas bapkeri Aleksandr Kımniń aıtýynsha, el birinshiligi jas sportshylardyń kórinýine jol ashyp, ulttyq qurama úzdikteriniń daıyndyǵyn bir baǵamdap alatyn doda.
«Elimizdegi sporttyq gımnastıka endi ǵana damı bastady. Ulttyq qurama da, olardyń izbasarlary da áli jas. Soǵan qaramastan, álem kýbogy kezeńderine sátti óner kórsete bastady. Osy oraıda, sportshylardyń jaǵdaıyn jasap, bizge qarjylyq jáne moraldy kómek kórsetip otyrǵan Qazaqstan Ulttyq Olımpıadalyq komıtetine alǵys aıtqym keledi. Aldaǵy jarys kúnderinde anyqtalatyn jeńimpazdardyń barlyǵy ulttyq quramaǵa shaqyrylyp, oqý-jattyǵý jıyndaryna qatysady», - deıdi bas bapker Aleksandr Kım.
Sporttyq gımnastıkadan Qazaqstan chempıonatyna Almaty, Qostanaı, Shymkent, Qaraǵandy, Astana, Taldyqorǵan, Semeı qalalarynan sportshylar qatysýda.
