Almatyda sport salasyndaǵy túıindi máseleler talqylandy
ALMATY. 7 jeltoqsan. QazAqparat /Názıra Eleýhan/ - Bıyl elimizdiń barlyq aýdandarynda jáne Almaty men Astana qalalarynda júrgizilgen respýblıkalyq áleýmettik zertteýler elimizdegi turǵyndardyń 8,9 paıyzy sportpen shuǵyldanatynyn kórsetti.
Al qalǵandary sportpen sırek aınalyssa, keıbiri tipti shuǵyldanbaıdy da. Bul týraly búgin Almatyda «Memlekettiń basty maqsat-mindetteri - sport pen týrızmdi damytý» atty taqyryppen ótken «dóńgelek ústel» otyrysynda «Qazaqstan sporty odaǵynyń» tóraǵasy Erlan Jańǵulov málim etti.
Onyń aıtýynsha, el turǵyndarynyń 63,6 paıyzy bos ýaqyttaryn telebaǵdarlamalardy qaraýmen ótkizedi. «Sondyqtan bul máseleniń sheshimin tabý kerek»,- dep atap ótti ol.
«Zertteý barysynda barlyq aımaqta sporttyq qural-jabdyqtar baǵasynyń qymbattylyǵyna baılanysty qoljetimsizdigi men bar jabdyqtardyń sapasyz ekendigi baıqaldy. Sondyqtan arnaıy komıssııa quryp, barlyq sport mekemelerinde sporttyq qural-jabdyqtardyń qamtylýy men sandyq-sapalyq qajettiligin anyqtaý qajet. Aýyldar men aýdan ortalyqtarynda sporttyq nysandar men sport zaldary az. Onyń sebebi nysandarǵa bólinetin qarjynyń azdyǵynan bolyp otyr. Bul máselede ınvestorlar men kásipkerlerdi tartý kerek dep oılaımyz. Sondaı-aq qurylys, avtomobıl joldary basqarmasy turǵyn úı keshenderin salý barysynda sporttyq alańdardyń mindetti túrde enýin qarastyrý kerek. Balalar alańdardyń jetkiliksizdin aıtýda»,- dep atap ótti Erlan Jańǵulov.
Ol jıyn barysynda ulttyq sportty damytý jolyn alǵa qoıý kerektigin atap ótti. «Koreıa elinde dzıýdo ulttyq sport túri bolyp sanalatyny belgili. Basqa da ár el óziniń ulttyq sportyn damytýǵa úlken úles qosýda. Bizdiń elde bul jaǵy kenje qalyp otyr. Biz sondyqtan ulttyq sporttyń biri bolyp sanalatyn qazaqsha kúresti synaq retinde mektepterge engizý kerek dep sanaımyz», -dedi ol.
