Almatyda Sport kúnine oraı buqaralyq júgirýden jarys ótti
ALMATY. Tamyzdyń 14-i. QazAqparat /Erbol Turymbetov/ - Búgin Almatydaǵy 28 gvardııashy-panfılovshylar saıabaǵynda erteńgi Sport kúnine oraı buqaralyq júgirýden jarys ótti,
dep habarlaıdy QazAqparat.
Ony Medeý aýdany ákiminiń apparaty Almaty marafonshylar klýbymen birlese uıymdastyrdy. Sharanyń maqsaty halyq arasynda salaýatty ómir saltyn nasıhattaýǵa jáne Prezıdent Joldaýyna saı, halyqtyń 30 %-yn buqaralyq sportqa keńinen qamtýǵa baǵyttalǵan.
«Deni saý urpaq - elimizdiń jarqyn bolashaǵy. Elimizde jyl saıyn atap ótiletin Sport kúnimen barshańyzdy quttyqtaımyn. Halyq arasynda salaýatty ómir saltyn qalyptastyrýda osyndaı sharalardyń mańyzy erekshe», dedi Almaty qalasy Medeý aýany ákiminiń orynbasary Berik Mustafın.
Sonymen qatar, saltanatty sharada Sıdneı Olımpıadasynyń jeńimpazy Olga Shıshıgına da bolyp, qatysýshylardy quttyqtady.
Sport kúni Qazaqstanda Respýblıka Prezıdenti Nursultan Nazarbaevtyń 2003 jylǵy 15-shi qarashasynda jaryq kórgen Jarlyǵyna sáıkes, tamyzdyń úshinshi jeksenbisinde atalyp ótiledi.
Jarysqa 14 jasqa deıingi balalar men áıelder jáne eresekter qatysty. Jarys sońynda jeńimpazdarǵa baǵaly syılyqtar tapsyryldy.
