Almatyda spıdveıden Álem birinshiligi ótkiziledi
ALMATY. QazAqparat- Almatyda 20-21 aqpan aralyǵynda «Medeý» bıik taýly muz aıdynynda spıdveıden (muzda mototsıklmen jarys) jeke eseptegi Álem birinshiliginiń ekinshi kezeńi ótkiziledi. Jarysqa álemniń jeti eli: Qazaqstan, Shvetsııa, Avstrııa, Germanııa, Reseı, Chehııa jáne Fınlıandııa elderinen barlyǵy 16 «muz gladıatory» qatysady.
«Biz Halyqaralyq mototsıkl federatsııasymen birlese otyryp, spıdveıden Álem birinshiliginiń kezeńin osymen ekinshi ret Qazaqstanda ótkizetindigimizdi maqtan tutamyz. Bul óte qyzyqty shara. Álem jurtshylyǵy «EKSPO-2017» halyqaralyq kórmesi qarsańynda Qazaqstan týraly taǵy da qyzyqty da tartymdy jańalyqtar estıtin bolady. «Astana EKSPO-2017» UK» AQ bıyl spıdveıden búkil Álem birinshiliginiń negizgi demeýshisi atandy. Bıyl barlyǵy bes jeke eseptegi Álem birinshiligi jáne bir komandalyq eseptegi Álem birinshiligi ótkiziledi» - dedi osyǵan oraı Qazaqstannyń Avtomotosport federatsııasynyń prezıdenti Marat Ábiqaev.
Aıta ketelik, 2016 jyly Spıdveıden Álem birinshiliginiń Jeke eseptik fınaly bes kezeńde ótkiziledi. Taıaý kúni birinshi kezeń Reseıdiń Krasnogorsk qalasynda ótkizilgen bolatyn. Ekinshi kezeń Almaty qalasynda, úshinshi kezeń - Germanııada (Berlın), tórtinshi - Gollandııada (Assen) jáne besinshi - taǵy da Germanııada (Intsel) uıymdastyrylady. Sondaı-aq, aldaǵy ýaqytta Reseıdiń Tolıattı qalasynda komandalyq eseptegi Álem chempıonaty da ótkiziledi.
Búgingi tańda, spıdveıdi álem boıynsha 20-dan astam sport arnalary kórsetedi. Sáıkesinshe, jylyna bul jarysty 200 mıllıonnan astam kórermen tamashalaıdy. Álem chempıonatynyń Almatydaǵy kezeńin Qazaqstan Respýblıkasynyń Avtomotosport federatsııasy Almaty qalasy ákimdiginiń qoldaýymen ótkizedi. Al «Astana EKSPO-2017» UK» AQ demeýshilik qoldaý kórsetedi.
