Almatyda sozylmaly aýrýy bar turǵyndardyń 10 paıyzy ekpe aldy
ALMATY. QazAqparat- Almatyda vaktsınalaý júıeli túrde ótip jatyr. Bul týraly «Respýblıkalyq elektrondyq densaýlyq saqtaý ortalyǵy» sharýashylyq júrgizý quqyǵyndaǵy RMK Almaty qalalyq fılıalynyń dırektory Gúlnar Ysqaqova onlaın brıfıng barysynda aıtty, dep habarlaıdy QazAqparat tilshisi.
Onyń sózinshe, qalada koronavırýske qarsy vaktsınanyń birinshi komponentin 240 myńdaı adam saldyrǵan. Vaktsına adamdardyń turǵylyqty tirkeý jerine qaramastan jappaı salynyp jatyr.
«Osy kúnge deıin vaktsına alǵandardyń basym kópshiligin medıtsına qyzmetkerleri qurap otyr. Sondaı-aq quqyq qorǵaý qyzmetkerleri men sozylmaly aýrýy bar esepte turǵandardyń 10 paıyzy ekpe aldy. Qazir vaktsınalaý boıynsha egde jastaǵy adamdar belsendilik tanytyp jatyr. Osy ýaqytqa deıin 60 jastan asqan 31 myń adam óz erikterimen kelip, vaktsına alǵan. Tipti 90 jasqa kelgenqarttardyń arasynda vaktsına saldyrý tańqalarlyq jaǵdaı emes. Olarda eshqandaı qıyndyq bolmady, ár adamda tek ekpe alsam degen nıet bolý kerek», - dedi Gúlnar Ysqaqova.
Sonymen qatar ol vaktsınanyń eki komponentin alǵandarǵa vaktsına alǵany týraly pasport taǵaıyndalatynyn aıtty.
«Ekpe alǵandardyń barlyǵy DSM-niń aqparattyq júıesiniń bazasynda tirkeýge alynady. Ekinshi komponentti alǵan soń vaktsına alǵany týraly pasport jasalady, ol úsh tilde shyǵady. Bul pasport qaǵaz túrinde qolǵa berilmeıdi. Ony kez kelgen adam elektrondy úkimet portalynda nemese qosymshasy arqyly júkteı alady», - dedi ol.
