Almatyda sozylmaly aýrýlardy qadaǵalaıtyn baǵdarlama bastaldy
ALMATY. QazAqparat - Almatyda juqpaly emes sozylmaly aýrýlardy basqarý baǵdarlamasy bastaldy.
Aýyr syrqattardy jeńýge baǵyttalǵan mundaı baǵdarlama Almaty qalasyndaǵy 3 emhanada qanatqaqty rejimde iske qosyldy.
Eger jańa júıe óz jemisin berse, qaladaǵy barlyq emdeý nysandaryna engiziletin bolady.
«Sozylmaly, ınfektsııalyq emes aýrýlardy basqarý baǵdarlamasy Qazaqstanda 2013 jyldan bastap 7 emhanada engizilgen. Úsh nozologııa boıynsha arterıaldy qan qysymy, qant dıabeti, sozylmaly júrek jetkiliksizdigi syrqattarynyń kórsetkishin azaıtýǵa baǵyttalǵan. Bizdiń №11 qalalyq emhanada 2016 jyldyń mamyr aıynan bastap engizilgen. Oǵan 201 naýqas qatysady», - dedi №11 emhananyń ýchaskelik terapevti Nazıra Ermekqyzy.
Osy baǵytta emhanada mýltıdıstsıplınarlyq komanda quralǵan. Onyń quramyna úılestirýshi, jalpy tájirıbelik 6 dáriger, 6 medbıke, kardıolog, sarapshy dáriger, 2 psıholog, 2 áleýmettik jumysker, salaýatty ómir saltyn qalyptastyrý ortalyǵynyń medbıkesi, medstatıst kiredi.
Joba komandasy 42 er adam men 160 áıel adamnyń densaýlyǵyn keshendi túrde qadaǵalap keledi. Jumys toby patsıentterdiń qan qysymyn ólshep, qajetti taldaýlardy (holesterın, kreatının) tapsyrady. Patsıentter júıeli túrde qan qysymy, basqa da kórsetkishterdi arnaıy kúndelikke toltyryp otyrady.
«Osylaısha adamdar óz densaýlyǵyn qadaǵalap, jaýapkershilikpen qaraýǵa úırenedi. Adamnyń oı-órisi ózgeredi. Joba ashylǵaly beri patsıentterdiń 75 paıyzynda qan qysymy turaqtala bastaǵan. Júrek jetkiliksizdigimen aýrýhanaǵa túsetinderdiń sany da 2 ese azaıǵan», - dedi Názıra Ermekqyzy.
