Almatyda sottyń sheshimimen iri meıramhana súrilip jatyr

ALMATY. QazAqparat – Almaty qalasy qurylysyn baqylaý basqarmasy jospardan tys tekserý barysynda Naýryzbaı aýdany «Aqjar» shaǵyn aýdanyndaǵy meıramhananyń ruqsat qujattarynsyz salynǵanyn anyqtady, dep habarlaıdy QazAqparat tilshisi.

Almaty ákimdiginiń baspasóz qyzmetinen málim etkendeı, menshik ıesine qatysty ÁQBtK-niń 316-babynyń 1-bóligi, 321, 463-bóligi 1-bóligi boıynsha ákimshilik sharalar qabyldanyp, anyqtalǵan buzýshylyqtardy joıý týraly usynys berildi. Belgili merzim ótken soń, menshik ıesi usynym talaptaryn oryndamaǵan. Osyǵan oraı, basqarma Almaty qalasynyń mamandandyrylǵan aýdanaralyq ekonomıkalyq sotyna zańsyz salynyp jatqan obektini buzý týraly talap aryz bergen.

«2022 jyldyń 26 tamyzynda sot sheshimimen talap aryz tolyq kólemde qanaǵattandyryldy, degenmen, jaýapker apellıatsııalyq shaǵym berdi. 2022 jyldyń 19 qazanynda qalalyq sottyń qaýlysymen birinshi ınstantsııadaǵy sottyń sheshimi ózgerissiz qaldy. Búgin, ıaǵnı, 13 sáýirde sot oryndaýshylarynyń qatysýymen nysan súrile bastady», - dep habarlady ákimdiktiń baspasóz qymzeti.

Eske salsaq, buǵan deıin Almatyda turǵyn úıge qosymsha salynǵan qurylys nysany men dámhana terrasasynyń súriletini týraly jazǵanbyz.