Almatyda sot sheshimimen bıznes-ortalyq súriletin boldy

ALMATY. QazAqparat - Almatyda bıznes-ortalyq kóptegen zań buzýshylyqtar úshin súriletin boldy, dep habarlaıdy QazAqparat tilshisi.

Almatyda Qojanov kóshesiniń shyǵysyndaǵy Eksperımentalnaıa kóshesiniń soltústiginde ornalasqan tórt qabatty ákimshilik ǵımarat kóptegen zańbuzýshylyqtar úshin buzylady.

Almaty ákimdiginiń málimetinshe, nysan jobanyń saraptamasynsyz salynǵan, sondaı-aq, bekitilgen bas jospardan aýytqýlar tirkeldi.
«Sot talapty alǵash ret Bostandyq aýdandyq sotyna 2020 jyldyń 6 naýryzynda jibergen. Sot sheshimimen talap aryz qanaǵattandyryldy, alaıda, 3 jyldan astam ýaqyt boıy apellıatsııalyq shaǵymdar men istiń jańa jaǵdaılaryna baılanysty sot talqylaýy jalǵasty.
2021 jylǵy 13 mamyrda memlekettik sot oryndaýshysy menshik ıesine sot sheshiminiń erikti túrde oryndalýy týraly habarlama jiberdi, alaıda, menshik ıesi jer ýchaskesin satty, osyǵan baılanysty sheshim oryndalmaı qaıtaryldy», - delinedi ákimdiktiń habarlamasynda.
Keıin Almaty qalasy qala qurylysyn baqylaý basqarmasy jer ýchaskesin satyp-alý shartyn jaramsyz dep taný týraly talap aryz berýge bastamashylyq etedi.

2022 jylǵy 27 qańtardaǵy sot sheshimimen mámile jaramsyz dep tanyldy, Almaty qalalyq sotynyń 2022 jylǵy 27 sáýirdegi qaýlysymen sheshim ózgerissiz qaldy.
Buzý kúni taǵaıyndalǵan soń, sot oryndaýshysynyń áreketterine shaǵym jasaldy jáne úshinshi tulǵa buzý týraly sheshimge Almaty qalalyq sotyna apellıatsııalyq shaǵym berdi.
«Almaty qalalyq sotynyń qaýlysymen apellıatsııalyq shaǵym qanaǵattandyrýsyz qaldyryldy, biraq keıin ol Joǵarǵy sotta qaraldy. Joǵarǵy sottyń qaýlysymen kassatsııalyq shaǵymdy qaraýdan bas tartyldy, sodan keıin sot oryndaýshysy buzý kúnin belgiledi.
Osylaısha, nysandy májbúrlep buzý búgin 26 shildede bastaldy», - dep habarlady Almaty ákimdiginiń baspasóz qyzmeti.