Almatyda sot medıatsııasy týraly dóńgelek ústel jıyny bolady

ALMATY. 26 naýryz. QazAqparat - Almatyda búgin, 26 naýryz kúni «Qazaqstandaǵy sot medıatsııasy: medıatorǵa júgingen ár ekinshi daý beıbit jolmen sheshýin tapty» degen taqyrypta dóńgelek ústel jıyny ótedi.

Atalmysh basqosýdy «Qaınar» ýnıversıtetiniń qoldaýymen Halyqaralyq quqyq qorǵaý ortalyǵy uıymdastyryp otyr.

Qazirgi ýaqytta QR Ádilet mınıstrligi tarapynan ázirlengen «bolmashy máseleler boıynsha daýlardy» sotqa talap aryz bererdiń aldynda mindetti túrde medıatorlarǵa júginý qarastyrylatyn zań jobasy talqylaný ústinde. Sondyqtan bul alqaly jıynnyń basty maqsaty - ilki jobanyń nátıjesin talqylaý jáne medıtsııaǵa baılanysty zań jobasyna usynystardy jınaqtaý men talqylaý.

Jalpy «Sot medıatsııasy» jobasy boıynsha bıyl Almaty qalasynyń Áýezov aýdanyndaǵy sottarda daý-damaılar men qaqtyǵystardy beıbit jolmen sheshý tásili usynyldy, oqý oryndarynda medıator bólmesi ashylyp, olarda kásibı medıatorlar jumys jasaı bastady. Oǵan uıytqy bolyp júrgen HQQO 1997 jyly Qazaqstan halqy Assambleıasynyń 9 ulttyq-mádenı ortalyǵynyń qoldaýymen, halyqqa aqysyz zańgerlik kómek kórsetý maqsatynda qurylǵan bolatyn. Qazir onda Medıatsııa ortalyǵy jáne Medıatorlardy daıarlaý mektebi jumys jasaıdy. Ortalyqtaǵy 63 medıatory búginig tańda Astana, Almaty, Aqtaý, Janaózen, Atyraý, Shymkent, Zyrıan, Qostanaı, Arqalyq, Óskemen qalalarynda medıatsııa rásimin júrgizip júr.