Almatyda sońǵy jeti kúnde koronavırýs juqtyrǵandar sany 2 esege ósti
ALMATY. QazAqparat– Almaty qalasynyń ákimi Baqytjan Saǵyntaev «Almaty» telearnasyndaǵy tikeleı efırde megapolıste qalyptasyp jatqan sanıtarlyq-epıdemıologııalyq jaǵdaı týraly aıtty, dep habarlaıdy QazAqparat tilshisi.
Almaty ákimi keltirgen málimetke sáıkes, qalada koronavırýs indetin sońǵy táýlikte 640 adam juqtyrǵan. Onyń 574-i sımptomdy, 66-y sımptomsyz, anyqtalmaǵan pnevmonııa – 4.
«Búginde qýattylyǵy 5200 tósek orynǵa ulǵaıǵan ınfektsııalyq statsıonarlarda barlyǵy 1947 patsıent, onyń ishinde 168 bala emdelýde. Sonymen qatar, naýqastardyń 55-iniń jaǵdaıy óte aýyr, 428-i aýyr, 1464 ortasha aýyrlyq dárejede. Reanımatsııa jáne ıntensıvti terapııa bólimderinde barllyǵy 133 naýqas bar. ÓJJ apparatynda – 28, ınvazıvti emes ÓJJ – 46, High flow apparatynda – 42»,- dedi ákim.
Sonymen qatar, ol qalada sanıtarlyq-epıdemıologııalyq ahýal ýshyǵa túskenin tilge tıek etti.
Delta nusqasyna qatysty KVI dertiniń edáýir ósýi jalǵasýda. Sońǵy 7 kún ishinde KVI-diń sımptomdy aýrýlarynyń úles salmaǵy ótken 7 kúnmen salystyrǵanda 2 esege ósken, 53%-dan 88%-ǵa deıin, bul KVI-diń aýyr klınıkalyq kórinisin qalyptastyratyn delta nusqa aınalymynyń tez taralýy saldarynan bolýda.
«Sońǵy 2 aptadaǵy jas quramynyń taldaýy delta nusqasynyń joǵary kontagıozdy bolýynan balalar men jastarǵa vırýs tez juǵýda: 2%-ǵa tómendeýine qaramastan 14 jasqa deıingi balalardyń úlesi 13%-dyq joǵary kúıinde qalýda; 20 jastan 40 jasqa deıingi azamattar arasynda derttiń eń joǵary deńgeıge 3,4%-ǵa (39%) asqynýy úlken alańdaýshylyq týdyrýda. Sondaı-aq 40-59 jastaǵylar arasynda juqtyrý deńgeıi – 25%, ıaǵnı, árbir 4-shi adam ınfektsııa juqtyrǵan. 60 jastaǵy aǵa býyn arasynda juqtyrýdyń úles salmaǵy 1,6%, bul ımmýndaný men mobıldiliktiń tómendiginiń nátıjesi»,- dedi Baqytjan Saǵyntaev.
Almaty ákimi qalalyqtardy koronavırýstyń aldyn alýdyń eń tıimdi ári jalǵyz qorǵany bolatyn vaktsınalaný qarqynyn tómendetpeýge shaqyrdy.
«14 shildedegi jaǵdaı boıynsha 615 661 adamǵa vaktsınanyń I komponenti egildi. Ótken táýlikterde vaktsınalanǵandar: 15 257 adam. Ekpe alǵandardyń jalpy sanynan 60 jastan asqandar 91 263 adamdy quraıdy»,-dedi qala basshysy.
Qalada medıtsınalyq uıymdarda, mektepterde, mádenı jáne sporttyq mekemelerde, bazarlarda jáne SOSO 212 vaktsınatsııa (250-ge deıin ulǵaıtý múmkindigi bar) pýnkti jumys isteıdi. Quramynda 1260 adam bar 308 ekpe brıgadasy jumyldyrylǵan.
