Almatyda sońǵy úsh kún ishinde nekelik sherýler quramyndaǵy 81 avtokóliktiń júrgizýshisi jaýapkershilikke tartyldy
ALMATY. QazAqparat- Almatyda sońǵy úsh kún ishinde nekelik sherýler quramyndaǵy 81 avtokóliktiń júrgizýshisi jaýapkershilikke tartyldy. Bul týraly búgin Almaty qalasy ІІD baspasóz qyzmetinen habarlady.
Olar jolda oraǵytý, basqa kólikterden basyp ozý, jol qozǵalysy erejelerin buzǵan. Keıbir júrgizýshiler tipti avtokóliginiń salonynan tys jerine jolaýshylar otyrǵyzyp aıdaǵan.
Jaz mezgilinde neke toılary kóbeıetini belgili. Sondyqtan da, qala kóshelerinde demalys kúnderi nekelik sherýler sany arta túsedi. Biraq, ókinishke qaraı, osynyń saldarynan jol qozǵalysy erejeleri de kóp buzylady. Osy sebepten Almaty qalasynyń polıtsııa qyzmeti nekelik sherýlerdiń quramynda jol erejesin buzǵan júrgizýshilerdi anyqtaý jumystaryn kúsheıtti.
«Ásirese demalys kúnderi qarbalasqa toly bolady. Birneshe ondaǵan kólikten turatyn nekelik sherýler ortalyq magıstraldarmen ǵana emes, ekinshi dárejeli kóshelermen de júredi. Qarsy jolaqqa shyǵyp ketý, baǵdarshamnyń qyzyl shamy jansa da jol qıylysynan ótip ketý, jol qozǵalysy erejesin buzý, apattyq jaǵdaı týdyrý, jyldamdyq erejesin jáne kólikti turaqqa qoıý erejesin buzý - olar úshin úırenshikti jaǵdaıǵa aınalyp ketken. Bul óreskel ereje buzýshylyq bolyp tabylady jáne ony jasaǵandar qatań jaýapkershilikke tartylady», - dedi óz sózinde Almaty qalasy ІІD ákimshilik polıtsııa basqarmasynyń bastyǵy Nurlan Almasbekov.
Sonymen qatar polıtsııa qyzmetkerleriniń aıtýynsha, jol qozǵalysy erejelerin buzý - jol qozǵalysynyń basqa da qatysýshylaryna qaýip tóndiretindigin jetkizdi.
«Tipti keı jaǵdaıda qozǵalys barysynda keıbir jolaýshylar kólikterdiń lıýkterinen jáne terezelerinen bastaryn shyǵarady nemese kólik júrgizýshileri dabyldaryn beı-bereket qosady. Al bul, árıne, basqa kólikterdiń júrisine kedergi keltiredi, apatty jaǵdaı týǵyzady», - dedi Nurlan Almasbekov.
