Almatyda sońǵy eki kún ishinde 676 zańsyz mıgrant ustaldy
ALMATY. QazAqparat - Almatyda sońǵy eki kún ishinde jeke turǵyn úıler sektorynda júrgizilgen tekserý sharalary barysynda 172 nysannan taıaý shet elderdiń 676 azamaty anyqtaldy.
Bul týraly búgin Almaty qalasy boıynsha salyq departamentiniń baspasóz qyzmetinen habarlady.
Anyqtalǵan azamattardyń eshqaısynyń ruqsat qujattary bolmaǵan.
Bul mıgranttar endi ákimshilik jaýapkershilikke tartylyp, keıin el aýmaǵynan shyǵarylady.
Salyq departamenti taǵy da jumys berýshi-jeke tulǵalardy tıisti zańnyń normalaryn saqtaýǵa shaqyrady.
QR «Halyqtyń kóshi-qony týraly» zańynyń normalaryn buzý, ıaǵnı eger jumys berýshi-jeke tulǵa eńbek mıgranttaryn ishki ister organdary beretin tıisti ruqsat qaǵazynsyz úı sharýashylyǵyndaǵy jumystarǵa tartatyn bolsa nemese kem degende bes eńbek mıgrantymen úı sharýashylyǵynda atqarylar jumystar men qyzmetter boıynsha eńbek kelisimshartyn jasamasa, onda ol «Ákimshilik quqyqbuzýshylyqtar» Kodeksine sáıkes, 30 aılyq eseptik kórsetkish kóleminde aıyppul tóleıdi.
Al eger de sheteldik azamat nemese azamattyǵy joq tulǵa Qazaqstan Respýblıkasynda zańsyz eńbek etetin bolsa, onda ol 25 aılyq eseptik kórsetkish kóleminde aıyppul tóleıdi jáne el aýmaǵynan shyǵarylady.
Jalpy, 2014 jyldan beri halyqtyń kóshi-qon máselesine qatysty zańnamalyq aktilerge engizilgen ózgeristerge sáıkes, eńbek mıgranttarynyń el aýmaǵyna kirip, eńbek etý úshin alatyn ruqsat qujattary ońaılatylǵan tártip boıynsha beriletini belgili.
Osylaısha, jyl basynan beri 3514 mıgrant ruqsat qujattaryn ońaılatylǵan tártip boıynsha alǵan. Olardyń bıýdjetke tólegen jeke tabys salyǵynyń kólemi 35,2 mln. teńgeni qurady.
Almaty qalasynyń salyq organdary turaqty negizde kóshi-qon polıtsııasymen birge el aýmaǵynda zańsyz eńbek etip júrgen shet eldik azamattardy anyqtaý jumystaryn júrgizip otyrady.
