Almatyda sońǵy 1,5 jyl ishinde 900-den astam sheteldik azamatqa zańsyz vıza berilgen - Almaty prokýratýrasy
ALMATY. QazAqparat - Almatyda zańsyz kóshi-qondy uıymdastyrǵan 5 zańdy tulǵanyń qyzmetine tosqaýyl qoıyldy. Bul týraly búgin Almaty qalasy prokýrorynyń orynbasary Berik Júıriktaev málim etti.
«Zańdy tulǵalar shet eldik azamattarǵa iskerlik ruqsatnamalardy olar konferentsııalarǵa, forýmdarǵa, kórmelerge, iskerlik kelissózderge, konsýltatsııalyq nemese aýdıtorlyq qyzmetter kórsetý sharalaryna qatysady degen sebeppen rásimdep berip otyrǵan. Alaıda, kórsetilgen kompanııalardyń shaqyrýymen kelgen sheteldikter ruqsatnama berýge negiz bolatyn sharalarǵa qatyspaǵan. Demek, olar Qazaqstanǵa basqa maqsatpen kelgen», - dedi B. Júıriktaev.
Al zańdy tulǵalar bolsa, rásimdep bergen ruqsatnamanyń túrine qaraı (D1, D2, D3), árbir sheteldik azamattan 30 myńnan 60 myń teńgege deıin syıaqy alyp otyrǵan.
Osylaısha, 2015 jyldyń basynan kúni búginge deıin Almatyǵa 900-den astam sheteldik azamat zańsyz shaqyrylǵan.
Almaty qalasynyń prokýratýrasy keltirilgen derekter boıynsha QR Qylmystyq Kodeksiniń 394-babynyń 3-shi tarmaǵy boıynsha (qylmystyq toptyń zańsyz kóshi-qondy uıymdastyrýy) qylmystyq is qozǵady.
Qazir sotqa deıingi tergeý sharalary júrgizilip jatyr.
