Almatyda soǵys jyldaryndaǵy ánder shyrqaldy
Merekelik sharany Qazaqstan Respýblıkasy Tuńǵysh Prezıdenti - Elbasynyń Qory «Degdar» gýmanıtarlyq qorymen birlesip uıymdastyrdy.
Belgili qazaqstandyq ártister soǵys jyldaryndaǵy súıikti ánderdi Qurmanǵazy atyndaǵy Qazaq ulttyq konservatorııasynyń úlken zalynda oryndady.
"Jeńis kúnine arnalǵan qaıyrymdylyq kontsert ótkizýdi 18 jyl buryn Darıǵa Nazarbaeva bastaǵan. Ol óziniń Ekinshi dúnıejúzilik soǵys ardagerlerine arnalǵan birinshi qaıyrymdylyq kontsertin 2001 jylǵy 6 mamyrda berdi. Darıǵa Nursultanqyzynyń dástúrli shyǵarmashylyq bastamasyn shyǵarmashylyq ókilderi qoldady. Maqsatymyz - Ekinshi dúnıejúzilik soǵys ardagerlerine, tyldaǵy ardagerlerge degen qurmet pen alǵysty kórsetý, jaýyngerlik áreketterge qatysýshylardyń erligin este saqtaý, Qazaqstan jastaryn patrıotızm rýhynda tárbıeleý", - dedi QR Eńbek sińirgen qaıratkeri Azamat Jyltyrgózov.
Kontsertti Ekinshi dúnıejúzilik soǵys ardagerleri men tyl qyzmetkerleri, Qazaqstan Respýblıkasy Generaldar Keńesiniń ókilderi, Aýǵanstandaǵy urysqa qatysqan jaýyngerler, áskerı mektepterdiń kýrsanttary, sondaı-aq Almaty qalasynyń joǵary oqý oryndarynyń stýdentteri men mektep oqýshylary tamashalady.
Soǵys jyldaryndaǵy jáne soǵystan keıingi jyldardaǵy kompozıtsııalardy tuńǵysh Prezıdent Qorynyń laýreattary - QR eńbek sińirgen qaıratkerleri Azamat Jyltyrgózov (barıton) jáne Medet Chotabaev (tenor); QR eńbek sińirgen qaıratkeri Gúlzat Dáýirbaeva (soprano); halyqaralyq konkýrstardyń laýreaty, «Forte Trio» memlekettik trıonyń solısi Dınara Bazarbaeva-Sahaman (skrıpka), ataqty pıanıst, QR eńbek sińirgen qaıratkeri, «Qurmet» ordeniniń ıegeri, «Vremen svıazýıýşaıa nıt» jobasynyń kórkemdik jetekshisi Tımýr Ýrmancheev oryndady.
Ártisterdiń óneri «Kamerata Kazahstana» memlekettik orkestriniń súıemeldeýimen, Pavel Tarasevıchtiń dırıjerligimen usynyldy.
Jeńis kúni merekesiniń aıasynda Tuńǵysh Prezıdenttiń Qory Ekinshi dúnıejúzilik soǵys ardagerleri men tyl qyzmetkerlerine aqshalaı syılyq jáne azyq-túlik sebetterin syıǵa tartty.
