Almatyda soǵys ardagerlerine stomotologııalyq qyzmet kórsetý úshin bıýdjetten 27 mln tenge bólindi
Almaty ákimdigi taratqan málimetke sáıkes, Erbolat Dosaevtyń tapsyrmasy boıynsha byltyrdan beri soǵys ardagerleri jalpy praktıka dárigerleri men arnaıy mamandardyń keńeıtilgen tekserýinen ótip turady. Sondaı-aq jalpy klınıkalyq taldaýlardy tegin tapsyryp, elektrokardıografııa, ýltradybystyq zertteý, magnıttik-rezonanstyq tomografııa men kompıýterlik tomografııadan ótedi. Budan bólek, ardagerler men olarǵa teńestirilgen adamdarǵa statsıonarda ońaltý, sanatorıı-kýrorttyq emdeý jáne stomatologııalyq kómek kórsetiledi.
Jyl basynan beri 673 adamǵa tis protezdeý qyzmeti kórsetildi. Osy maqsattar úshin soǵys ardagerleriniń qalalyq emhanasyna 2023 jylǵa Almaty bıýdjetinen 27 mln teńge bólindi.
«2023 jyldyń basynan beri tegin medıtsınalyq kómektiń kepildik berilgen kólemi jáne mindetti áleýmettik medıtsınalyq saqtandyrý aıasynda Ekinshi dúnıejúzilik soǵystyń 3243 qatysýshysy jáne olarǵa teńestirilgen adamdar keńeıtilgen medıtsınalyq tekserýden ótti. Jyl sońyna deıin osy sanattaǵy almatylyqtardyń 100% - y keńeıtilgen medıtsınalyq tekserýden ótedi»,- dep habarlady qalalyq ákimdikten.
Sonymen qatar, ózdigimen júre almaıtyn naýqastardy aı saıyn ýchaskelik dárigerler nemese medbıkeler tekseredi. Dári-dármekterdi úıge tegin jetkizý uıymdastyryldy. Jyl sońyna deıin 3900-den astam ózdiginen qozǵala almaıtyn patsıent úıinde tolyq medıtsınalyq tekserýden ótedi.
Barlyq medıtsınalyq uıymdarda qart jaýyngerler men olarǵa teńestirilgen adamdarǵa únemi estelik syılyqtar men azyq-túlik salynǵan dorba tapsyrylady.
Sondaı-aq, Almaty ákiminiń tapsyrmasy boıynsha áleýmettik qyzmet mamandary ardagerlerdi turaqty aralaıdy, sonyń nátıjesinde olarǵa qandaı kómek qajet ekenin anyqtaıdy jáne ony ataýly túrde kórsetedi.
- Jóndeý jáne montajdaý jumystary;
- Turmystyq qurylǵylardy alýǵa kómek kórsetiledi;
- Materıaldyq kómek;
- Zańgerlik jáne basqa kómek.
Mysaly, Naýryzbaı aýdanynyń ardageriniń kireberisiniń aǵash terezeleri jańasyna aýystyrylyp, esiginiń aldyna asfalt tóseldi.
Alataý aýdanynyń ardagerine 1,5 mln teńgege sý qubyry men káriz jelisin tartý jumystary júrgizildi. Ótinishter ártúrli jáne eshqaısysy nazardan tys qalmaıdy.
Aǵa býyn almatylyqtardyń ómir súrý sapasy men uzaqtyǵyn júıeli túrde arttyrý úshin megapolıste 50 myńnan astam adamǵa tegin áleýmettik qyzmet kórsetetin belsendi uzaq ómir súrýdiń 9 ortalyǵy jumys isteıdi. 2023 jyly taǵy bir osyndaı ortalyq ashý josparda.
