Almatyda soǵys ardagerlerine qansha teńgeden berildi
ALMATY. QazAqparat – Almatyda ekinshi dúnıejúzilik soǵys ardagerlerine 1 mln teńge kóleminde qarjylaı kómek berý usynyldy. Mundaı usynysty Almaty qalasy Áleýmettik ál-aýqat basqarmasynyń basshysy Názıra Toǵyzbaeva qalalyq máslıhatynyń kezekten tys IV sessııasynda aıtty, dep habarlaıdy QazAqparat tilshisi.
«Ekinshi dúnıejúzilik soǵystaǵy Jeńistiń 76 jyldyǵyna oraı soǵys ardagerlerine beriletin bir rettik tólem mólsherin 500 myńnan bir mıllıon teńgege deıin ulǵaıtýdy usynamyz. Sondaı-aq ekinshi dúnıejúzilik soǵysy jyldarynda tylda eńbek etkenderge jáne qaıtys bolǵan ekinshi dúnıejúzilik soǵys múgedeginiń zaıybyna (jubaıyna) - 50 myń teńgeden tóleýdi usynymyz»,- dedi Almaty qalasy Áleýmettik ál-aýqat basqarmasynyń basshysy Názıra Toǵyzbaeva.
Máslıhat depýtaty Kúpesbaı Jampeıisov bul óte mańyzdy ekenin atap ótti.
«Almatyda tek 129 soǵys ardageri qaldy. Elbasy Nursultan Nazarbaev atap ótkendeı: «Ardagerlerge degen maqtanysh pen qurmet ár qazaqstandyqtyń júreginde máńgi saqtalady». Qazaqstan soǵysta jeńiske jetý úshin aıtarlyqtaı úles qosqanyn bárimiz bilemiz. Men kún saıyn ardagerlermen sóılesemin, olar 76-jyldyq mereıtoıyna bılik, máslıhat olardy qalaı baǵalaıdy eken dep kútedi. Sondyqtan biz, máslıhat depýtattary, mıllıon tóleý týraly sheshim qabyldaǵanymyzǵa óte qýanyshtymyn»,-dedi ol.
