Almatyda «Social innovation-2018» ınnovatsııalyq jobalar baıqaýy bastaldy
Bul baıqaýǵa 156 qazaqstandyq novator qatysýǵa ótinish bildirgen. Qazylar alqasy úzdik degen 50 jobany tańdap aldy.
Uıymdastyrýshy QR Tuńǵysh Prezıdenti qorynyń ókilderi aıtqandaı, jańa tehnologııalardy áleýmettik salaǵa engizý basty maqsat bolyp tabylady.
«Eń aldymen jobanyń áleýmettik mańyzdylyǵyna baǵa beriledi. Áleýmettik mańyzy bar, qoǵamǵa paıdasyn tıgizetin ınnovatsııalyq jobalar ǵana qor tarapynan qarjylandyrylady», - dedi «Aqparattyq-resýrs ortalyǵy» qoǵamdyq qorynyń dırektory Altynaı Kóbeeva.
Novatorlar zaǵıp jandarǵa arnalǵan ınternet-radıo men balalarǵa arnalǵan 3D- mýzeı, analarǵa arnalǵan mobıldi qosymsha oılap tapqan.
Bul jobalardy júzege asyrýǵa 1-5 mln teńge aralyǵynda grant bólinbek.
Qazaqstan kommýnıkatıvti qaýymdastyǵynyń dırektory Baǵıla Ahatova Almatydaǵy kıeli jerler boıynsha ınteraktıvti karta jasap, úsh tilde jolnusqa oılap tapqan.
«Qala - tek kósheler men ǵımarattardan turmaıdy ǵoı. Ár ǵımarattyń tarıhy bar. Ár adamnyń sol ǵımaratpen, saıabaqpen baılanystary estelikteri bar. Endi adamdar ınternette ár oryn týraly estelik qaldyra alady. Máselen Murat Áýezov aǵamyz úshin Bógenbaı kóshesindegi alleıa óte ystyq. Ol Jazýshylar odaǵynda jumys jasaǵan kezinde sol alleıada júrip shabyt alatyn. Oljas Súleımenov bolsa, qalanyń tamyry sanalatyn, Abaı kóshesimen sozylyp jatqan arnany unatatyn», - dedi B. Ahatova.
67 jastaǵy zeınetker Kúlásh Almatshaeva 40 jyldan beri UOS kezindegi turmystyq zattardy saqtaýmen aınalysyp keledi. Zeınetker 30 chemondanǵa sııatyn kollektsııa jınap úlgergen.
Óz jobasyn Kúlásh apa «Chemodandaǵy mýzeı» dep ataýdy usyndy.
«Men osy zattardy jınap alyp, qarttar úıindegi qarııalarǵa, balalar úıindegi balalarǵa kórsetemin. Olarǵa osy turmystyq zattar týraly, sol zamandaǵy qıyndyqtar týraly aıtyp beremin. Men olarǵa Ekinshi dúnıejúzilik soǵys pen azamattarymyzdyń erlikteri týraly aıtyp beremin. Kóp adamdar estelikterimen bólisedi» - dedi ol.
Sonymen qatar, K.Almatshaeva kollektsııasyndaǵy eń qundy jádigerler - zergerlik buıym jasaıtyn stanok pen Ekinshi dúnıejúzilik soǵys kezindegi radıı dybys zoraıtqyshymen tanystyrdy.
Odan bólek jumyssyz adamdarǵa kıiz basýdy úıretý, zeınetkerlerdiń kompıýterlik saýatyn ashý, Kaspıı teńizinde jaǵajaı salý týraly jobalar tanystyryldy.
Atalǵan baıqaý 6-sáýirge deıin jalǵaspaq.
50 úmitkerdiń ishinde 10 joba avtory qarjylyq qoldaý tabatyn bolady.
