Almatyda skandınavııalyq júristen Ortalyq Azııadaǵy tuńǵysh jarys ótedi
ALMATY. QazAqparat - 2 shilde kúni Almatydaǵy «Atakent» ortalyǵynda Almaty Nordic Walking Fest ataýymen skandınavııalyq júristen jarys ótedi, dep habarlaıdy QazAqparat tilshisi.
Sharanyń uıymdastyrýshysy - Vankýverdegi Qysqy Olımpıada oıyndarynyń kúmis júldegeri Elena Hrýstalevanyń Olımpııalyq qory. Jarys tańǵy saǵat 9.00-de bastalady.
Ortalyq Azııada alǵash ótkeli otyrǵan bul jarysqa jasy 14-ten asqan barlyq adam qatysa alady. Al múmkindigi shekteýli jandar úshin jeke reıtıng qarastyrylǵan. Uıymdastyrýshylardyń aıtýynsha, atalmysh sport el arasynda tanymaldyqqa ıe bolyp keledi. Sondyqtan, festıval budan bylaı turaqty ótkizilmek.
Keleshekte festıval aıasy keńeıip, Almatydan bólek, Nur-Sultan, Shymkent qalalaryn, kórshiles Qyrǵyzstan jáne Ózbekstan memleketterin de qamtıtyn bolady.
