Almatyda sırek kezdesetin kitaptar men qoljazbalar kórmesi uıymdastyryldy
ALMATY. Qazannyń 5-i. QazAqparat /Erbol Turymbetov/ - Almatydaǵy QR Ulttyq kitaphanasynda «Sırek kezdesetin kitaptar men qoljazbalar qorynyń máseleleri» atty respýblıkalyq konferentsııa-kórme bolyp ótti,
dep habarlaıdy QazAqparat.
Onda Qazaqstan kitaphanalarynyń jáne respýblıkalyq kitap murajaıynyń sırek kitaptar men qoljazbalar qorynan 400-den asa qundy jádigerleri qoıyldy. Jıyn barysynda Qazaqstan kitaphanalaryndaǵy sırek kitaptar men qoljazbalar qorynyń qazirgi jaǵdaıy men ony tolyqtyrý, saqtaý, qaıta qalpyna keltirý jáne t. b. máseleler talqylandy. Konferentsııa-kórmeniń jumysyna respýblıkalyq kitaphanalar basshylary jáne sırek kitaptar men qoljazbalar qory bólimderiniń qyzmetkerleri qatysty. Sondaı-aq, Ulttyq akademııalyq kitaphananyń, Oblystyq ámbebap ǵylymı kitaphanalarynyń, QR BǴM Ortalyq ǵylymı kitaphanasynyń, Respýblıkalyq kitap murajaıy men QR Ulttyq memlekettik kitap palatasynyń jetekshi mamandary jáne basqalar boldy.
«Uıymdastyrylyp otyrǵan bul sharanyń eń kóne jádigeri - HІІ ǵasyrdan jetken qasıetti Quran kitaby. Ol elimizdegi eń kóne kitap bolyp tabylady. Sonymen birge, HVІІІ ǵasyrda basylǵan Quran kitabynyń salmaǵy 9 keli tartady. Kórmege biz ıAsaýıdiń hıkmetteri (HІH) men Baqyrǵanıdyń eńbekterin (HVІ) de qoıyp otyrmyz. Oǵan qosa, kórmede HVІ-HІH ǵasyrlar aralyǵyn qamtıtyn Eýropa jáne orys kitaptary kórinis tapqan», dedi QR Ulttyq kitaphanasy sırek kezdesetin kitaptar men qoljazbalar qorynyń meńgerýshisi Nabat Musahanqyzy.
Kitap kórmesinde ál-Farabı atyndaǵy QazUÝ-niń kitaphanasy da óz qundylyqtaryn usyndy. Basqosý sońynda sırek kitaptar jáne qoljazbalar qorymen jumysty jetildirýge baǵyttalǵan birneshe usynystar qabyldandy.
