Almatyda sırek kezdesetin dertke shaldyqqan adamdarǵa dári-dármek tegin beriledi
ALMATY. QazAqparat – Almatyda sırek kezdesetin aýrýlary bar 500-den astam patsıent bıýdjet esebinen dári-dármekpen qamtamasyz etiledi. Bul týraly máslıhattyń VII sessııasynda Almaty qalasy qarjy basqarmasynyń basshysy Qanat Sýhambekov málimdedi, dep habarlaıdy QazAqparat tilshisi.
Onyń aıtýynsha, densaýlyq saqtaý salasyna qosymsha 3,8 mlrd teńge bólý usynylady. Bul qarajattyń bir bóligi orfandyq aýrýlary bar adamdardyń qajettilikterine baǵyttalady.
«Sırek kezdesetin (orfandyq) aýrýlardyń 8 túri boıynsha 553 patsıentti tegin dárilik zattarmen qamtamasyz etý úshin 495,3 mln teńge qarastyrylǵan», - dep naqtylady Qanat Sýhambekov.
2017 jyldan bastap jergilikti bıýdjet esebinen dári-dármekpen qamtamasyz etýdi qajet etetin orfandyq aýrýlary bar naýqastardyń sany 40 eseden astam ósti. 2017-2022 jyldar kezeńinde qarjylandyrý somasy 8 esege artty. Sonymen qatar ol Almatyda 5 densaýlyq saqtaý nysanynyń qurylysy bastalatynyn aıtty. Onyń jobalyq-smetalyq qujattamasyn ázirleýge 158,3 mln teńge qarastyrylǵan. Ortalyqtandyrylǵan zararsyzdandyrý bólimshelerin jaraqtandyrýǵa jáne medıtsınalyq jabdyqtardy satyp alý úshin 12 medıtsınalyq uıymǵa jalpy somasy 2,3 mlrd teńge bólinedi.
