Almatyda sıntetıkalyq esirtki satatyn 128 saıt buǵattaldy

ALMATY. QazAqparat - Almatyda jarty jyldyń ishinde 183 esirtki qylmysy anyqtaldy, onyń ishinde esirtkiniń zańsyz aınalymy boıynsha 76 fakti bar, dep habarlaıdy QazAqparat tilshisi.

«Zańsyz aınalymnan 62 kg astam esirtki tárkilendi. Atap aıtqanda, 669 gramm geroın, 24 kg gashısh jáne 36 kg marıhýana. Internetke monıtorıng júrgizý arqyly esirtki preparatyn satatyn saıttardy anyqtaımyz. Bul jumystar turaqty túrde júrgiziledi. Bıyl osyndaı 138 saıt ashylǵan, onyń 128-i buǵattaldy», - deıdi Almaty PD Esirtkige qarsy kúres basqarmasynyń bastyǵy Talǵat Berkinbaev.

Almaty polıtsııasy esirtki satýǵa qatysty aqparatty arnaıy mobıldi qosymsha arqyly qabyldaıdy.

«KazCyberSystems» otandyq kompanııasymen birlese otyryp, arnaıy júıe ázirledik. Turǵyndar esirtki bıznesimen aınalysatyn, qylmystyq áreketterge barǵan adamdar týraly aqparatty bizge joldaýǵa múmkindik aldy. Qajet bolsa, sýret jáne beıne formattaǵy mátindi de jibere alady. Bul júıe ázirge Almatyda qoldanylyp jatyr. Aldaǵy ýaqytta barlyq óńirlerde iske qosylady dep kútilýde. Jańa baǵdarlama aqparat jiberýshige esirtki quraldarynyń «keshteri», olardyń yqtımal paıdalanylýy, satylýy, tasymaldanýy, esirtki bıznesin júrgizip otyrǵan qylmyskerlerdiń mekenjaılary týraly habarlaýǵa múmkindik beredi. Sondaı-aq, azamattar bul aqparatty jasyryn bere alady. Bul baǵdarlama tek aqparat qana qabyldaıdy. Hat almasý platformasy emes ekenin atap ótkim keledi. Stoptraffic qosymshasy Android PlayMarket júıesindegi myna silteme arqyly qoljetimdi. Bolashaqta biz IPhone qurylǵylaryna ótinim ázirleýdi josparlap otyrmyz», - dedi Talǵat Berkinbaev.